Bu gün külək turbinləri elektrik enerjisi istehsal etmək üçün dünyadakı ən ucuz elektrik stansiyalarıdır. Gələcəkdə külək turbinlərindən daha da çox enerji təmin etmək qabiliyyətimiz yeni yaranan texnologiyalar vasitəsi ilə daha əlçatan olacaq. Bunun üçün isə mühəndislər küləyin sürətli və güclü əsdiyi hündürlüklərə çıxmağı, pərləri böyütməyi hədəfləyirlər. Lakin çox hündür qüllələrin artan xərcləri və daşınıb, quraşdırma problemləri də böyükdür.
Küləyin fasiləsiz və sürətli olduğu yerlər adətən yerdən hündür məsafədə yerləşir. Modvion şirkəti isə bu hündür yerlərə çatmaq üçün maraqlı bir yenilik təklif edərək kömək edəcəyini bildirib və bu layihə ilə bağlı yeni açıqlamalar verib. Həll yolu ondan ibarətdir ki, adi bir yük maşınına yüklənməsi mümkün olan ağac parçaları daşınacaq və tikinti yerində bir-birinə bərkidiləcək. Aşağıdakı şəkildən də gördüyünüz kimi qövsvari taxta lövhələr sadəcə montaj üçün uyğun olacaq.
Modvion şirkəti hələ ki, ağacdan hazırlanmış 150 metrlik külək turbinləri hədəfləyir. Şirkətin əsas hədəfi isə inanılmazdır. Modvion şirkəti növbəti 10 illiklərdə 1500 metrlik ağacdan qüllələr hazırlamağın potensial olaraq mümkün olduğunu bildirir. Taxta xüsusilə yığılıb izolyasiya olunduqda, çox davamlı və yüngül ola bilir. Qüllənin materialının ucuz və yüngül olması isə quraşdırılacaq yerin təməlində normal külək turbinləri kimi möhkəmləndirilməyə ehtiyac yaranmasının qarşısını alacaq. Nəticədə xərclər də müəyyən qədər azalacaq.
Ətraf mühiti təmizləməyə çalışarkən həddindən artıq karbon emissiyasına səbəb olmaq əlbəttə ki, heç kimin istəməyəcəyi bir haldır. Nəhəng polad qüllələrin tikintisi təbii olaraq istixana effektinə səbəb olan CO2 emissiyalarını yaradır. Taxta qüllələr isə polad emalından ayrılan karbon emissiyalarını azaltmağı təmin edir. Ağlınıza ekologiyanı qorumaqdan danışıb, ağacları kəsmək gələ bilər. Lakin şirkət bildirir ki, taxta materiallar əsasən yonqar və ya yaşlı ağaclardan hazırlanır. Qeyd edilənə görə ağac yetişdirərək bu tip işlərdə istifadə etmək digər fərqli materiallardan hazırlanan dirəklərdən qat-qat ucuz və effektiv nəticə verir.
İsveç şirkəti olan Modvion şirkəti 2016-cı ildən bəri məhz bu arzusunun arxasınca gedir. 2020-ci ildə ilk 30 metrlik külək turbinləri ucaltmaq onlara prestij qazandırıb. Şirkətin əsas uğuru ondan ibarət idi ki, onlar 150 metrlik qüllə hissələrini və zavodu ötən ilin oktyabrında hazırlayıblar. Bu addım şirkətə ilk böyük razılaşmalarını qazandırıb. Dünyanın ən böyük müstəqil bərpa olunan enerji şirkəti olan RES (Renewable Energy Systems), 2026-2036-cı illər arasında hər il taxtadan hazırlanmış ən az 20 külək turbini quraşdırılacağını bildirib. Ümumi dəyəri 380 milyon dollar olan sövdələşmə külək turbinlərinin karbon izini 30% azaldacaq.
