Apple şirkətinin istehsal etdiyi naqilsiz qulaqlıqlar xüsusilə iPhone istifadəçiləri arasında çox populyardır. Məhz Apple ekosisteminin parçası kimi iPhone və Apple Watch modellərindən sonra, ən çox alınan məhsullar AirPods seriyasına məxsusdur. Lakin AirPods seriyasının qiymətinin xeyli yüksək olması alıcıların seçimini xeyli çətinləşdirir. Rəsmi olaraq Apple tərəfindən satılan ən ucuz qulaqlıqlar məhz AirPods ikinci nəsildir. Bu qulaqlıların Amerikadakı qiyməti 130$-dan başlayır. Daha yeni üçüncü nəsil təqribi 170$, AirPods Pro isə 250$ səviyyəsinə qədər yüksəlir. Ona görə də daha münasib qiymət səviyyəsində yeni bir Apple qulaqlıqlarının çıxarılmasına ehtiyac var. Analitik Jeff Lu tərəfindən verilən məlumata əsasən Apple şirkəti bunun üçün AirPods Lite üzərində işlərə başlayıb.
Apple şirkəti AirPods Lite ilə 2023-cü ildə digər qulaqlıqlara tələbin düşməsinə qarşı özünü sığortalaya bilər
Verilən məlumata görə Apple şirkətinin AirPods seriyasına olan tələb bu il müəyyən qədər azalacaq. Statistik göstəricilərdə 2022-ci ildə AirPods seriyasının 73 milyon ədəd satdığı bildirilir. AirPods Lite barədə məlumat verən analitik Jeff Lu, bu ildən satış ədədlərinin 60-63 milyona qədər düşəcəyini təxmin edir. Beləliklə, satışların düşməsi ilə AirPods seriyasından olan gəlirlərin azalmaması və daha münasib qiymətə müştəri cəlb etmək üçün Apple şirkəti yeni naqilsiz qulaqlıq üzərində işləyir.
AirPods Lite qulaqlığının texniki xüsusiyyətləri ilə bağlı dəqiq bir informasiya mövcud deyil. Ola bilsin ki, şirkət birinci və ya ikinci nəsil AirPods qulaqlıqlarının adını dəyişib, daha münasib qiymətə yeni kimi bazara çıxaracaq. Lakin daha zəif texniki imkanlara sahib büdcəvi bir qulaqlıqlar da Apple şirkəti tərəfindən təqdim edilə bilər.
