Cənubi Koreyanın texnologiya nəhənglərindən olan Samsung şirkəti yeni məhsulu ilə qarşımızdadır. Belə ki, şirkət ən yeni məhsullarından biri olan və yeni nəsil cihazlar üçün hazırladığı Flex Hybrid OLED ekranını tanıtdı. Bu yeni panel həm qatlana bilmək həm də uzana bilmək xüsusiyyətlərini bir arada təqdim etməsi ilə fərqlilik gətirir. Beləliklə smartfonlar, planşetlər və noutbuklar üçün nəzərdə tutulmuş panel müxtəlif istifadə üsullarına görə forma ala bilir.
Qatlana bilən modellər təklif etməklə rəqibləri ilə arasında böyük fərq yaradan Samsung şirkətinin Flex Hybrid modelinin bir tərəfi qatlama texnologiyasına malik olsa da, digər tərəfi uzanma funksiyasına malikdir. Başqa sözlə, Flex Hybrid OLED iki forma faktorunu bir gövdədə birləşdirən məhsuldur deyə bilərik. Bu xüsusiyyətləri sayəsində kompakt bir quruluşdan çox daha böyük ekrana çevrilə bilir.
Qatlana bilən cihazların dayanmadan inkişaf etdiyi zamanda tanıdılan bu cihaz açıldıqda 4:3 nisbətində 10,5 düymlük ekrana çevrilir. Tam uzadılaraq genişləndirildikdə isə 16:10 ekran nisbətinə malik 12,4 düymlük cihaz ortaya çıxır. Bununla qatlana bilən smartfonların təqdim etdiyi ekran ölçüləri artmış sayılır. Yəni, istər film, istər YouTube videolarına baxmaq üçün ideal olan görüntü nisbəti əldə etmiş oluruq.
Flex Hybrid OLED Samsung şirkətinin təqdim etdiyi tək yeni məhsul olmayacaq
Samsung bu innovativ OLED panelini Las-Veqasda keçiriləcək CES 2023 sərgisində nümayiş etdirəcək. Şirkət həmçinin tədbirdə daha iki uzana bilən OLED panelini, Flex Slidable Solo və Flex Slidable Duet məhsullarını da nümayiş etdirəcək. Bu ekranlar, Samsung şirkətinin gələcək yeni cihazlarında görə biləcəyimiz sürüşdürülən bir quruluşa malik olacaq. Adı çəkilən bu modellərin hər biri ilə CES 2023 sərgisindən sonra tanış ola biləcəyik.
