Nəhayət gözlənilən an gəlib çatdı və qrafik kartları ilə bazarda liderlik edən Nvidia daha performanslı və daha müasir texnologiyalı qrafik kart modellərini təqdim etdi. Belə ki, CES 2024 tədbirində Nvidia brendi yeni RTX 40 Super seriyalı RTX 4070 SUPER, RTX 4070 Ti SUPER və RTX 4080 SUPER qrafik kartlarını təqdim edib. Daha əvvəl gəlməyəcəyi iddia edilən SUPER seriyalı qrafik kartları artıq rəsmi olaraq təqdim edilib.
Beləliklə Nvidia brendi RTX 40 qrafik kartlarını SUPER seriyası ilə birlikdə tamamladı. İlk öncə onu qeyd edək ki, yeni RTX 4070 SUPER, RTX 4070 Ti SUPER və RTX 4080 SUPER qrafik kartları təbii ki, sələflərindən daha üstün performans təklif edir. Lakin yeni qrafik kartlar mövcud RTX 4070, 4070 Ti və ya 4080 istifadəçilərinə deyil, daha az performanslı RTX qrafik kartlarından istifadə edənlərə müraciət edir. Buna səbən isə yeni qrafik kartlar ilə sələfləri arasında o qədərdə böyük performans fərqinin olmamasıdır. Yeni təqdim edilən qrafik kartlar arasında ən güclüsü məhz yeni təqdim edilən 16GB G6X 256 bit VRAM-a malik olan RTX 4080 Super modelidir.
Yeni RTX 4080 Super sələfindən fərqli olaraq 9728 deyil, 10.240 CUDA nüvəsi üzərində qurulub. Bu isə qrafik kartın bir az daha yüksək saat sürətinə və yaddaş genişliyinə malik olmasına şərait yaradır. 16 GB G6X 256-bit VRAM ilə 4070 Ti SUPER isə sələfindən fərqli olaraq 7680 deyil, 8448 CUDA nüvəsi üzərində qurulub. RTX 4070 Super isə RTX 4070 modelindən fərqli olaraq indi 220 Vt TGP dəyərinə sahibdir. Qeyd edək ki, hazırda Gigabyte, Zotac, Asus və MSI kimi bir çox şirkət 599, 799 və 999 dollar qiymət etiketi ilə yeni qrafik kartları hazırlayıblar.
