Bu gün Çində baş tutan təqdimat tədbiri çərçivəsində Huawei şirkəti özünün yeni nəsil flaqman modellərini təqdim etdi. Həmin flaqmanlardan ən diqqət çəkəni Huawei P60 seriyası oldu. 2021-ci ilin iyul ayında son dəfə yenilənmiş “P” seriyası 2 illik aradan sonra 3 fərqli modellə birlikdə satışa çıxarılıb. Lakin smartfonlar doğrusunu desək, əvvəlki qədər maraq yaratmağı bacarmayıblar. Başlıca olaraq Snapdragon 8+ Gen 1 (LTE/4G) çipseti və təklif edilən qiyməti, Çində belə seriyanın “Pro” modellərində 1000$ üzərində olması bizləri cihazdan soyudan detallar arasındadır.
Huawei P60 seriyası daxilində 3 yeni model mövcuddur. Bunlara Huawei P60, P60 Pro və P60 Art modelləri aiddir. Texniki cəhətdən cihazlar eyni gövdə üzərində qurulduğundan ekran paneli başda olmaqla əsas dizayn cizgiləri birə-bir eynidir. Lakin Huawei P60 Art modeli arxa tərəfdə kamera modulunun kənarlarını əhatələyən dizaynı ilə biraz fərqlənməkdədir. Dizayn biraz zövqlərə xitab edən anlayış olsa da, P60 seriyasının o qədər də mükəmməl alınmış kimi görünmür. Xüsusilə simmetriya və kamera modulunun detallarındakı həndəsi ölçülər sanki, bir-birinə təzad yaradır.
Smartfonların hər biri 6.67 düymlük LTPO OLED ekran panelinə malikdir. BOE istehsalı 1.7K təsvir ölçülü 1-120Hz adaptiv tezlikli ekran paneli Huawei şirkətinin Kunlun adlı qoruyucu şüşəsi ilə zərbələrə qarşı olduqca dayanıqlıdır. Ekran 4 tərəfdən 360 dərəcəlik “şəlalə” konseptinə uyğun olaraq aqressiv qıvrımlara malikdir. Ekran çərçivə nisbəti ideal səviyyədədir və gözə xoş xitab edir. Ekranın PWM tezliyi isə 2160Hz təşkil edir.
Huawei P60 seriyası kamera xüsusiyyətləri baxımından çox qarışıq vəziyyətdədir
Kamera baxımından isə cihazlar 48MP (50MP) RYYB kamera sensoru ilə təchiz ediliblər. Huawei ümumilikdə 48MP kameralar deyib, detalları bölüşməsə də P60 modelinndə istifadə olunan sensorun 48MP IMX789, digər cihazların isə ~50MP IMX888 sensoru ilə gücləndirildiyi məlumdur. Lakin sensor Sony əməkdaşlığında xüsusiləşdirildiyindən hər üçü 48MP RYYB kimi vahidləşdirilir. Yəni, ad eyni olsa da detallar fərqlənir. Huawei şirkəti F/1.4-F/4.0 dəyişkən aralıqlı diafraqma ilə kamera performansını biraz da təkmilləşdirməyə çalışıb. Bu difraqma sensora düşən işıq miqdarını adaptiv tənzimləməklə görüntüləri xeyli yaxşılaşdırır. Əslində, dəyişən diafraqma da əvvəlki cihazlardan bizə tanışdır.
Ultra-geniş bucaqlı kamerada isə Huawei P60 və P60 Pro modelləri eyni 13MP kamera ilə təchiz edilmiş olarkən, P60 Art modelində 40MP kamera sensoru işlədilib. Telefoto kamerasında P60 modeli nisbətən daha zəif F/3.4 diafraqma açıqlığına malik 12MP IMX688 telefoto sensoru ilə gücləndirilib. Digər cihazlarda isə daha təkmili 48MP kamera sensorundan güc alan telefoto obyektivi quraşdırılıb. Qəribəlik isə bu hissədədir. P60 modeli daha zəif kamera sensoru ilə 5 qat optik yaxınlaşdırma edərkən, digər 2 model daha güclü kamera sensoru ilə 3 qat optik yaxınlaşdırma edə bilir.
Şirkət ümumilikdə kamera performansı baxımından özünü ötən günlərdə təqdim olunan Oppo Find X6 Pro ilə belə müqayisə etsə də, texniki xüsusiyyətlər bizi biraz tərəddüddə saxlayır. Şirkətin XMAGE bölümünün inkişaf etdirdiyi texnologiyalar, xüsusilə XD Fusion Pro ilə gələn imkanlar rəngləri işləməkdə çox iddialı olsa da nəticələri real gözlə görmək lazımdır. Sonda qeyd edək ki, cihazlaırn əsas və telefoto kameralarında OIS mövcud olub, selfi kameraları 13MP təsvir ölçüsünə malikdir.
Cihazların yerdə qalan xüsusiyyətləri nələrdir?
Smartfonlar ötən il çıxmış Snapdragon 8+ Gen 1 çipsetinin 4G dəstəkli variantından güc alırlar. Beidou üzərindən peyk bağlantısı dəstəyinə malikdirlər. Huawei P60 seriyası kameraları kimi batareyaları tərəfində də biraz qarışıq detallar ortaya qoyurlar. Huawei P60 modelində 66 vatt naqilli, 50 vatt naqilsiz şarj dəstəyi olmaqla 4815 mAs batareya vardır. Huawei P60 Pro və P60 Art modelləri isə 5100 mAs həcmli batareyaları ilə 88 vatt naqilli, 50 vatt naqilsiz şarj dəstəyi verir. Həmçinin bu 2 modeldə 7,5 vatt tərs şarj vardır. Cihazlar IP68 sertifikatı ilə suya və toza qarşı dayanıqlıdır.
Huawei P60 seriyasının qiymətləri necədir?
Huawei şirkəti aralarındakı ən qəribə dizayna malik Huawei P60 Art modeli elə ən bahalı model olub 512GB başlanğıc variantı üçün 1316$ istənilir. Uyğun olaraq P60 modelinin 128GB başlanğıc variantı 657$, P60 Pro modelinin başlanğıc variantı 1023$ təşkil edir.
