Bu gün baş tutan təqdimat tədbirində Huawei P60 seriyasından əlavə digər bir yenilik Mate X3 oldu. Bəli, Huawei şirkəti qatlana bilən Mate X xəttini uzun bir müddət sonra tamamilə dəyişdirərək qarşımıza çıxardı. Lakin bu smartfon da yenə hamının zövqünə xitab etməyəcək üsluba malikdir. Xüsusilə də kamera modulunun dizaynı POCO X3 seriyasını xatırladır ki, elə X3 deyərkən ağıla ilk gələn modellə bənzərlik çox maraqlı təsadüf doğurur. Buna baxmayaraq sanki, bu dizayn P60 seriyasından daha premium hissiyat yaşadır. İlk diqqət çəkən nüans smartfonun qalınlığı və çəkisidir. Sadəcə 5,3 mm qalınlığında və 239 qram olan cihaz rəqibləri arasında başlıca olaraq Galaxy Z seriyasından xeyli erqonomikdir.
Mate X3 seriyası nə vəd edir?
Texniki baxımdan ən vacib detal xarici ekranın böyüklüyü və gövdə nisbətidir. Huawei Mate X3 modelindəki xarici ekran 20,9:9 gövdə nisbət ilə 6.4 düymlük olduqca ideal bir orta ölçülü smartfon təcrübəsi verir. 1.5K təsvir ölçülü BOE tərəfindən istehsal olunumş 120Hz AMOLED ekran paneli ilə gücləndirilib. Daxildə isə 7.8 düymlük yenə 1.5K təsvir ölçülü 120Hz adaptiv tezlikli LTPO OLED ekran quraşdırılıb. 1440Hz PWM texnologiyası ilə göz sağlamlığı cəhətdən seqmentində ideal bir ekran paneli ilə bu model rəqiblərini üstələməyi bacarır.
Təbii ki, bu cihaz yüngül və nazik olmağı yeni nəsil qatlama mexanizmi sayəsində bacarır. Məhz bu yeni mexanizmin faydalarından isə digər bir tərəfdən ekran paneli yararlanır ki, yaranan qırışları müəyyən qədər azaldır. Həmçinin, bu yerdə smartfonun peyk bağlantısını dəstəkləyən ilk qatlanan smartfon olduğunu da xatırlatmaq lazımdır.
Kamera texnologiyaları baxımında isə Mate X3 modelində 50MP IMX766 sensoru ilə gücləndirilmiş əsas, 12MP 5 qat optik yaxınlaşdırma edə bilən IMX351 və o cümlədən 13MP IMX688 ultra-geniş bucaqlı kameralar görürük. XMAGE texnologiyası ilə gücləndirilmiş bu kameralar rəqabətcil olacaqlar. Lakin texniki tərəfdən baxdıqda elə “P60” seriyası kimi yenə də geri qaldıqları müşahidə edilir.
Smartfon öz gücünü Snapdragon 8+ Gen 1 çipsetindən alır. “P60” seriyasında olduğu kimi yalnız 4G bağlantısını dəstəkləyən Huawei Mate X3, 4800 mAs həcmli batareya ilə təklif olunur. IPX8 sertifikatı ilə sıçramalara və toza qarşı qorunan cihaz uyğun olaraq 66 vatt naqilli, 50 vatt naqilsiz şarj oluna bilər. Huawei Mate X3 modelinin qiyməti isə nə az, nə çox tam olaraq 256GB yaddaş variantı üçün 1999$-dan başlayır. Əgər 2340$ ödəyib 1TB həcmli variantını əldə etsəniz, eksklüziv variant kimi 5060 mAs həcmli batareya əldə edəcəksiniz.
