Oppo şirkəti bu gün Çində baş tutan tədbirdə Find X6 seriyasını təqdim etdi. Oppo Find X6 seriyası sözün əsl mənasında istehsalçının bir smartfonda detallara necə diqqət yetirdiyini göstərən, gec-gec qarşımıza çıxan nümunələrdən biri ola bilər. Çünki, elə birbaşa dizayna baxdıqda cihaza hər yaxınlaşdıqda fərqli möhtəşəm detallar görmək olur. Məsələn, aşağıdakı şəkilə uzaqdan baxdıqda iki fərqli rəng kombinasiyası üzərinə, dəri teksturalı və ilk baxışdan aqressiv kamera performansına işarə edən smartfon görürsünüz.
Biraz yaxınlaşdıqda isə hər bir detalın necə mükəmməl ahənglə birləşdiyini daha yaxşı anlaşılır. Əvvəla kamera modulunun ətrafındakı xətti naxışlı halqa smartfonun nəhəng kamera modulunun ətrafında qalınlıq anlayışını itirir. Kamera modulunun üzərindəki hissə isə 2 fərqli dizayn elementi ilə işlənir. Dairənin aşağı hissəsi nazik araları olan metal kəsikli görünüş əldə edərkən, dairənin üst hissəsində şüşə materiallı səth istifadə olunur.
Dizayndan bu qədər danışmaq bir o qədər yorucu, lakin cihazın konseptini anlamaq baxımından Oppo Find X6 seriyası üçün vacibdir. Çünki, xüsusilə Oppo Find X6 Pro modeli texniki xüsusiyyətlərinin nə qədər təkmili olduğunun vizual olaraq ilk öncə dizaynından başlayaraq nümayiş etdirir. Məsələn, dünyanın ən parlaq 2500 nit ekranı, bir cihazda olan ən keyfiyyətli periskopik və ultra-geniş bucaqlı kamera və daha nələr-nələr bu cihazla bağlı danışılmalı detallar arasındadır.
Oppo Find X6 seriyası kamera tərəfində nə vəd edir?
İlk olaraq cihazların kamera parametrləri barədə danışmağa başlayaq. Oppo Find X6 Pro modelinin əsas kamerası 23 mm fokus məsafəli 1 düymlük Sony IMX989 kamera sensoru ilə gücləndirilib. Əsas kamera üçün bu texniki imkan adi hala çevrilmiş olduğundan, Oppo şirkəti ultra-geniş bucaqlı və periskopik telefoto kameranı keyfiyyət baxımından əsas kameraya yaxınlaşdırmağa çalışıb. Belə ki, cihazda 1/1.56 düymlük Sony IMX890 kamera sensoru sadaladığımız hər 2 kamerada işlədilir.
65 mm fokus məsafəli periskopik-telefoto kamerası 3 qat optik, 6 qat hibrid (50MP sensorun təsvir ölçüsünün yüksək olması hesabına), 120 qat rəqəmsal yaxınlaşdırma edə bilməkdədir. Uyğun olaraq 110° ultra-geniş bucaqlı kamera, 4 sm məsafədən makro kamera kimi işlədilə bilər. Ultra-geniş bucaqlı kamerada olmasa da digər kamera OIS ilə gücləndirilib.
Smartfon Hasselblad əməkdaşlığında obyektivlərdə bir çox təkmilləşmə almaqla qalmayıb, MariSilicon X çipinin gücü ilə görüntü keyfiyyətində əhəmiyyətli inkişaf əldə etmişdir. Xüsusilə gecə çəkilişlərində smartfon sektorda lider olduğunu iddia etməkdədir. XPAN texnologiyası tərəfindən dəstəklənən HEIF, DNG, RAW, JPEG kimi formatlarda görüntü qeydə ala bilən cihaz, eyni zamanda Dolby Vision 4K HDR çəkilişləri dəstəkləyir. Əlavə olaraq Hasselblad Portre rejimi sayəsində cihaz, kameralar üçün XCD30 və XCD80 Hasselblad obyektivlərinə oxşar fotolar qeydə ala bilər. Bunun üçün smartfon texniki tərəfdə ultra-geniş bucaqlı və periskopik kameranın imkanlarından yararlanır.
Ön tərəfdə isə 32MP təsvir ölçülü IMX709 kamera sensoru işlədilib. Lakin selfi kamerası 21 mm fokus məsafəsinə sahib daha təkmili bir obyektivlə yenilənib. Bu da görüntülərin keyfiyyətini artıracaq detallar arasındadır. Oppo Find X6 modelində bəzi detallar bənzər şəkildə mövcud olsa da, əsas kamera texniki cəhətdən IMX989 əvəzinə IMX890 ilə, ultra-geniş bucaqlı kamera isə ISOCELL JN1 ilə əvəzlənib. Bu da kamera performansına ciddi təsir etməkdədir.
Oppo Find X6 seriyası daxilində cihazların dizaynı bənzər olsa da, Find X6 modelinin kamera modulunda və kənarlarındakı halqa üzərində xırda işləmələr mövcud deyil.
Oppo Find X6 Pro modeli dünyanın ən parlaq ekranına sahibdir
Find X6 Pro modelində 6.82 düymlük 1-120Hz adaptiv tezlikli AMOLED ekran paneli işlədilir. 3168x1440p təsvir ölçülü 2K ekran paneli 2500 nit maksimum parlaqlığı ilə gün işığında istifadəyə adətən meydan oxuyur. İndiyə qədər çıxarılmış cihazlar arasında ən parlaq ekrana sahib cihaz, eyni zamanda bir çox mühim keyfiyyət standartların da özündə birləşdirir. Ekran özü Gorilla Glass Victus ilə qorunur.
Oppo Find X6 seriyası daxilində digər cihazımız Find X6 isə nisbətən daha zəif ekran ilə gəlir. 6.74 düymlük AMOLED ekran paneli 1450 nit maksimum parlaqlığa və 2772×1240 piksel təsvir ölçüsünə malikdir. 40-120Hz tezlikli ekran paneli texniki baxımdan sələfi üzərinə ciddi bir dəyişiklik almayıb.
Seriya daxilində 2 fərqli çipset işlədilib. Snapdragon 8 Gen 2 çipseti Oppo Find X6 Pro modelində varkən, sadə modeldə Dimensity 9200 çipseti işlədilib. Lakin LPDDR5X və UFS 4.0 yaddaş çipləri baxımından bir dəyişiklik yoxdur. MariSilicon X çipi isə standart olaraq cihazlarda mövcuddur.
Cihazlar arasında batareya texnologiyaları da fərqlənir. Find X6 Pro modelində 5000 mAs həcmli və 100 vatt sürətli şarj dəstəkləyən batareya quraşdırılıb. Bu batareya eyni zamanda 50 vatt kabelsiz şarj dəstəkləyir. BBK qrupunun bayraqdarı olan Oppo da 1600 şarj perioduna zəmanət verir. Find X6 modeli isə 4800 mAs həcmli və 80 vatt sürətli şarj dəstəkləyən batareyaya malikdir. Naqilsiz şarj yoxdur. Cihazlar arasında IP68 və IP54 sertifikatı cəhətdən də fərqlər var.
Oppo Find X6 seriyası neçəyə təklif edilir?
Seriyanın ən güclü nümayəndəsi olan Oppo Find X6 Pro modeli 12-256GB başlanğıc variantı üçün 5999 Yuan (~870$) təşkil edir. Oppo Find X6 modeli üçün bu qiymət 12-256GB başlanğıc variantında nisbətən daha ucz, 4999 Yuan (~730$) olmaqla satışdadır.
