Bəzi Tesla sahibləri isti və günəşli havalarda avtomobillərinin şarj sürətini artırmaq üçün maraqlı üsul kəşf ediblər. Belə ki, Tesla sahiblərinin sözlərinə görə yaş dəsmal ilə elektromobillərinin şarj sürətini artırmaq mümkün olur. Bunun üçün sadəcə yaş dəsmalı şarj kabelinin ucuna bükmək lazımdır. Ümumiyyətlə, elektrikli avtomobillərin yüksək temperaturda batareyalarını qorumaq üçün şarj sürətini azaltdığı məlumdur.
Məşhur Tesla forumlarında danışılan bu üsul görünür, həqiqətən də işləyir. Metodun xüsusilə aktiv soyutma kabelləri olmayan köhnə V2 Supercharger stansiyalarında yaxşı işlədiyi bildirilir. Yaş dəsmal və ya parça ilə bükülmüş şarj konnektoru yalnız günəşdən qorunmur, həm də buxarlanma nəticəsində soyuyur. Bununla da, şarj konnektrou daha yüksək cərəyanın ötürülməsinə imkan verir. Bir Tesla sahibi, bu üsulla isti bir gündə V2 Supercharger stansiyasında şarj sürətini 60 kVt-dan 95 kVta yüksəltməyə nail olub.
Qeyd edək ki, bundan da yaxşı nəticələr əldə edilib. Out of Spec Studios komandası elektromobillərini 2% şarj ilə stansiyaya qoşub. Şarj sürəti 147 kVt sürətə çatdıqdan sonra 34%-də darboğaza çatıb və sürət 58 kVt-a düşüb. Məhz bundan sonra, yaş dəsmal ilə sürəti 119 kVt-a çatdırmaq mümkün olub. Metodun Cybertruck istisna olmaqla, yeni V3 Supercharger stansiyalarında çox yaxşı işləmədiyi bildirilir. Əlbəttə bu üsul möcüzələr yaratmır, yalnız bir neçə dəqiqəlik qazanc əldə etmək olur. Kabeldəki istilik şarj sürətini təyin edən yeganə amil deyil. Batareya hüceyrələrinin temperatur vəziyyəti şarj sürətinə təsir edən ən vacib amil olaraq qalır.
