Bildiyiniz kimi, ilk dəfə Intel və Apple şirkətləri ilə birgə hazırlanmış Thunderbolt texnologiyası cihazlarda aktiv olaraq istifadə olunur. Davamlı olaraq inkişaf edən və yenilənən Thunderbolt üçün 5.0 texnologiyası yayımlanıb. Belə ki, 2020-ci ildə Intel 3-cü nəsil texnologiya ilə oxşar sürətlər təklif edən Thunderbolt 4.0-ı elan etmişdi. Bu gün nəhayət, Thunderbolt 5 rəsmi olaraq elan edildi. Yeni standart cari sürəti üç dəfə artırmağa imkan verir.
Keçən il Intel yeni nəsil Thunderbolt texnologiyası üçün ilk planlarını açıqladı. Ancaq bundan sonra heç bir detal paylaşılmadı. Lakin artıq Thunderbolt 5.0 rəsmi olaraq yayımlanıb və detalları bəlli olub. Hal-hazırda mövcud olan Thunderbolt 4 ikili 4K monitor və ya tək 8K monitor üçün dəstəkdən əlavə 40 Gbps ötürmə sürəti təklif edir.
Thunderbolt 5 isə Bandwidth Boost texnologiyasının istifadəsindən asılı olaraq 120 Gbit/s-ə qədər ümumi ötürmə qabiliyyətinə malik olacaq. Standart 80 Gbps iki istiqamətli əlaqəyə əlavə olaraq, 540Hz yeniləmə sürəti, çoxsaylı 8K və üç 4K 144Hz çıxışı üçün dəstək təklif olunur.
Yeniliyin digər diqqətçəkən xüsusiyyəti isə onun DisplayPort 2.1, USB v4, USB 3 20G və PCIe Gen4 standartlarına uyğun olmasıdır. O, həmçinin 240 Vt-a qədər şarj dəstəyi olan bəzi noutbuklar üçün ayrıca şarj kabelinə ehtiyacı aradan qaldıracaq. PCIe Gen4 uyğunluğunun daxil edilməsi də vacib haldır. Çünki, bu texnologiya xarici GPU-lar üçün daha çox bant genişliyi təklif edəcək. Bununla belə, bunu tam dəstəkləmək üçün sistemlərə 64 Gbit/s sürətlə işləyən PCIe uyğun portlar lazımdır.
Thunderbolt 5-in ilk olaraq Intel Meteor Lake prosessorlu noutbuk modellərində təqdim ediləcəyi gözlənilir. Bu nöqtədə qeyd etməliyik ki, oktyabr yeni prosessorlar üçün aydır. Buna görə də rəsmi olaraq bu texnologiyaya malik ilk sistemlər 2024-cü ildə satışa çıxarılacaq.
