Qualcomm şirkətinin flaqman Snapdragon 8+ Gen 1 çipseti yavaş-yavaş smartfonlar arasında nəhayət istifadə olunmağa başlayır. Bir neçə həftə sonra Xiaomi, Motorola, OnePlus, Asus kimi brendlər bu çipsetlə öz yeni cihazlarını satışa çıxaracaqlar. Snapdragon 8+ Gen 1 çipsetinin uğurlu çıxışından sonra isə gözlər 8 Gen seriyasının yeni nümayəndəsinə yönəlib. Ehtimal edilən texniki detallarına görə istifadəçiləri daha həyəcanlandıran Snapdragon 8 Gen 2 çipsetinin təqdimat tarixi ilə bağlı məlumatlar ortaya çıxıb. Qualcomm rəsmi səhifəsi üzərində Snapdragon Summit ilə bağlı xəbər dərc olunub. Beləliklə yeni nəsil arxitekturaya, TSMC əsaslı istehsal prosesinə sahib olması gözlənilən Snapdragon 8 Gen 2 çipseti noyabr ayında təqdim edilə bilər.
Snapdragon 8 Gen 2 çipsetinin 14-17 noyabr tarixləri arasında təqdim edilməsi gözlənilir
Qualcomm şirkəti hər ilin dekabr ayı keçirdiyi Snapdragon Summit tədbirində öz yeniliklərini, o cümlədən yeni çipsetini təqdim edir. Lakin Qualcomm rəsmi saytında dərc edilib, daha sonra silinən bir xəbərdə Snapdragon Summit tədbirinin 14-17 noyabr tarixləri aralığında keçiriləcəyi göstərilir. Tarixin nə qədər dəqiq olduğu barədə əmin olmasaq da, xəbərin rəsmi qaynaq tərəfindən paylaşılması böyük bir ehtimalla yazılanların doğru olduğunu təsdiq edir. Yəni tədbir hansısa səbəblərə görə deyəsən 1 ay önə çəkilib.
Snapdragon 8 Gen 2 və ya SM8550 olaraq adlandırdığımız çipset barədə məlumatlı deyilsinizsə, qısaca sizin üçün xatırlatma edək. Belə ki, TSMC-nin ikinci nəsil 4nm texnoloji prosesi ilə hazırlanacaq bu çipset 1+2+2+3 tipli nüvə düzülüşü ilə gələcək. Bu nüvələrdən biri Cortex-X3, ikisi Cortex-A710, üçü Cortex-A510 olacaq. Daha ətraflı məlumat üçün aşağıdan Snapdragon 8 Gen 2 barədə məqaləyə nəzər yetirə bilərsiniz.
Ehtimallara görə ötən ildən fərqli olaraq bu çipseti alan ilk model Xiaomi tərəfindən təqdim ediləcək. Son illər burada ilk olmağı Motorola ələ almışdı. Nəticə etibarilə 8 Gen 2 noyabr ayında təqdim edilə bilər, amma bu çipsetin işlədildiyi cihazları dekabr ayından tez görmək inandırıcı deyil. Əgər ilk smartfon Xiaomi 13 olacaqsa, Xiaomi 12S seriyası ilə müqayisədə heç olmasa 6 ay keçməsi lazımdır. Yeni çipsetlə bağlı fikirlərinizi rəylərdə bizimlə bölüşə bilərsiniz.
