Rusiya iqtisadi sanksiyalara boyun əyməmək üçün əlindən gələni edir. Belə ki, artıq Rusiyada satılan bütün smartfonlar RuStore tətbiq mağazasına sahib olacaq. Bununla bağlı qərar artıq qəbul olunub. Yerli tətbiq mağazası bütün Android smartfonlarda əvvəlcədən quraşdırılacaq. Bununla da Rusiyaya tətbiq edilən daha bir sanksiya əvəzsiz qaldı.
Maraqlısı budur ki, Rusiyada satılan bütün smartfonlar ilk dəfə işə salındıqda RuStore tətbiq mağazası ilə birlikdə gələcək. Həmçinin bu tətbiq mağazası istifadəçilər üçün pulsuz olaraq təqdim ediləcək. Əslində yerli tətbiq mağazası ilə bağlı Rusiyanın baş naziri Mikhail Mişustin göstəriş vermişdi. Hətta bu göstəriş Google Play və AppStore tətbiq mağazalarının rəqəmsal bazardan çıxarılması fondunda verilmişdi.
Xatırladaq ki, daha əvvəl Rusiyanın Rosa Mobile əməliyyat sisteminə sahib ilk smartfonu təqdim edilmişdi. Hətta bu smartfon Rusiyanın texnologiya sahəsindəki ən böyük uğurlarından biri hesab olunmuşdu. Yeni təqdim edilən model 6.7 düymlük ekrana sahib olmuşdu. Kamera tərəfində isə smartfon 3 kamera sensoruna sahib olmuşdu. Bu kameralardan birinin 50MP olduğu da ictimaiyyətə açıqlanmışdı. İki sim kart yuvası, Wifi , Bluetooth və NFC kimi müasir texnologiyalarda smartfonun daxilinə quraşdırılmışdı. Həmçinin yeni təqdim edilən smartfon bu gün bir çox smartfonda rast gəldiyimiz barmaq izi sensoru ilə təchiz edilmiş, lakin bu barmaq izi sensoru ekranın altında deyil, smartfonun yan tərəfində quraşdırımışdı. Bundan əlavə USB-C portu və 3.5 mm jack girişi də smartfonun xüsusiyyətləri arasında olub.
