Bu vaxta qədər prosessorların zirvə göstəricisini təyin edən ən maraqlı detal onun hansı tezlikdə işləməsi ilə əlaqədar olub. Intel prosessorlarında rəsmi olaraq qeydə alınmış ən yüksək tezlik indiyə qədər 2011-ci ildə Intel Celeron D 352 ilə qeydə alınmışdı. Bu prosessorun tezliyi 8.5 GHz və ya 8543,7 MHz olmaqla ən yüksək nəticəni göstərmişdi. Lakin bu rekordu qıracaq prosessorun Intel tərəfindən məhz bu il təqdim olunacağı aşkar idi. Çünki, 9 sentyabr tarixində qeyri-rəsmi olaraq Intel Core i9-13900K prosessoru 8 GHz tezlikdə test edilərək sızdırılmışdı. Belə ki, tanınmış sürət aşırtma mütəxəssisi olan Elmor, Intel 13-cü nəsil “Raptor Lake” seriyası Core i9-13900K prosessorunu rəsmi olaraq 9008.82 MHz tezlikdə işlətməyi bacarıb.
13-cü nəsil Core i9 prosessoru 9 GHz tezlikdə işləyərək tarixi rekordu təzələyib
Normal istifadəçilər üçün nəzərdə tutulmuş prosessorlar arasında bundan əvvəlki rekord AMBD FX-8370 prosessoru ilə bundan təqribən 10 il əvvəl qeydə alınıb. Həmin prosessor tam olaraq 8.7 GHz tezliyə qədər yüksəlməyi bacarmışdı. ElmorLabs tərəfindən isə nəhayət, Intel prosessoru ilə bu rekord 2022-ci il bitmədən yenilənə bildi.
Asus ROG Maximus Z790 Apex ana lövhəsi üzərində işləyən Core i9-13900K “Raptor Lake” prosessoru bu rekordu əldə etmək üçün maye azotlu soyutma sistemindən yararlanıb. Tam olaraq -250.2°C temperatura qədər soyudulan prosessor bundan sonra 9008.82 MHz tezliyə çatmağı bacarıb. Effektivlik üçün nəzərdə tutulan nüvələr qapadılıb və SMT(Simultaneous Multi Threading) aktiv olduqda tək nüvəyə 1.84V gərginlik verilib.
Nəticədə isə istehlakçılar üçün nəzərdə tutulan prosessorlar arasında, Core i9-13900K prosessoru 9 GHz limitini aşaraq rəsmi şəkildə rekordu ələ alıb. Həmin vaxt qeydə alınan video ilə aşağıdan tanış ola bilərsiniz.
