Apple şirkətinin ekosisteminə daxil olan cihazlar insanların işini həqiqətən asanlaşdırır. Ekosistemin ən vacib elementlərindən biri isə cihazlar arasında bağlılığın güclü olmasıdır. Yəni firmanın istehsal etdiyi bütün cihaz və avadanlıqlar rahatlıqla bir-biri ilə əlaqə yarada bilməlidirlər. Apple isə bunu çox yaxşı bacarır. Bu ekosistemə ötən il əlavə edilmiş Apple AirTag modelini yəqin ki, xatırlayırsınız. 50 qəpiyin diametri ilə müqayisədə sadəcə 7mm daha genişdir. Cihazı açar, çanta, pul kisəsi kimi itirə biləcəyiniz əşyalara bağlayaraq daim onların yeri barədə məlumat öyrənə bilirsiniz. Yəni AirTag-ın əsas məqsədi olduğu yer barədə sizə məlumat verməkdir. Azərbaycan dilində brelok deyə bildiyiniz bu cihazı, bəlkə də “ağıllı açarlıq” kimi adlandırsaq məntiqli ola bilər. Belə ki, ağıllı açarlıq nə qədər əşyalarınızı itirməməyə görə nəzərdə tutulsa da mənfi məqsədlər üçün AirTag hal-hazırda izlənmə cihazına çevrilib.
Kaliforniyadakı aktrisa 2 saat boyunca AirTag ilə naməlum şəxs tərəfindən izlənilib
İrlandiyalı yazıçı və aktrisa Hannah Rose May iyun ayında Kaliforniyadakı Disneyland əyləncə parkına ziyarət edib. Lakin aktrisanın xəbəri olmadan çantasına atılan AirTag ilə getdiyi yerlər nöqtəsinə qədər naməlum şəxs tərəfindən dayanmadan izlənilib. Xoşbəxtlikdən iPhone modeli işlədən Hannah R.M bir müddətdir üzərində gəzdirdiyi naməlum AirTag ilə izlənmə barədə “Find My” tətbiqindən bildiriş alıb.
Bluetooth bağlantısı ilə smartfona bağlanan AirTag ağıllı açarlığı Find My tətbiqi üzərində təhlükəsizlik bildirişi göndərib. Bildirişdə isə Hannah-ın koordinatlarının AirTag ilə görüldüyü qeyd edilib. Lakin Find My tətbiqi iPhone modelinə bu xəbərdarlığı yalnız bildiriş şəklində göndərir. Yəni bildirişlərə baxmırsınızsa bununla bağlı xəbərdar olmayacaqsınız.
ABŞ-də hazırlanmış hesabatlar göstərir ki, insanlar həqiqətən AirTag ilə cinayət, oğurluq və sadalamaq istəmədiyimiz bir çox səbəblərə görə izlənilir. Aktrisa yaşadığı bu vəziyyəti paylaşmasından sonra bəzi izləyiciləri bənzər halla qarşılaşdığını bildirib.
Hətta bir neçə ay əvvəl yenə eyni vəziyyətlə qarşılaşan bir insan polisə belə izləndiyi barədə şikayət edib. Bəzilərinin avtomobilindən, bəzilərinin yenə çantasından tapılan AirTag cihazları ciddi təhlükəsizlik problemləri yaradır.
AirTag ilə izlənib-izlənmədiyini Android istifadəçiləri necə öyrənə bilər?
iPhone istifadəçiləri Find My tətbiqi ilə izlənmə barədə məlumatlandırılır. Ayrıca olaraq şirkət Android cihazlar üçün də “Tracker Detect” adlı tətbiq hazırlayıb. Play Store üzərindən qeyd etdiyimiz kimi yazıb yükləyə biləcəyiniz bu tətbiq deyilənə görə sizi AirTag ilə izlənmədən qoruya bilər. Lakin test etmədiyimiz üçün nə qədər effektiv işlədiyindən əmin deyilik.
