Bildiyimiz kimi, Google Apple şirkəti ilə uzunmüddət əməkdaşlıq edir. Hətta bu vəziyyət bir çox texnologiya nəhənginin o cümlədən Bing axtarış mühərrikinə sahib Microsoft-un xoşuna getmir. Vəziyyət o həddə çatıb ki, ABŞ məhkəməsi də Google şirkətini rəqabəti aradan qaldırdığı üçün cəzalandırmaq istəyib. Aparılan araşdırmalar göstərmişdi ki, Google Apple şirkətinin bütün cihazlarında əsas axtarış sistemi olmaq üçün sərvət ödəyib. İndi isə Google şirkətinin Samsung cihazlarında əsas axtarış sistemi olmaq üçün şirkətə pul təklif etdiyi də ortaya çıxıb.
Ümumiyyətlə internet nəhəngi Google Safari brauzeri vasitəsi ilə əldə etdiyi axtarış yönümlü reklam gəlirinin 36%-ni Apple şirkətinə ödəyib. Hətta şirkət sadəcə Apple cihazları ilə yetinməyib. Belə ki, Google Samsung cihazlarında da əsas axtarış sistemi olmaq istəyir. Hətta bu gün ortaya çıxıb ki, Google öz servislərini sadəcə Galaxy cihazlarında saxlamaq üçün Samsung şirkətinə 4 il ərzində 8 milyard dollar ödəyib. Google Search, Play Store və Assistant xidmətlərinə əhatə edən bu müqavilə indi əsass tənqid mövzusuna çevrilib. Maraqlısı budur ki, Samsung Google Play Store gəlirlərinin yarısını əldə edir.
Görünən odur ki, Samsung Google üçün Apple şirkəti qədər önəmlidir. Hətta internet nəhəngi Samsung ilə əməkdaşlığa davam edə bilmək üçün hər il milyardlarla dollar ödəyir. Xatırladaq ki, daha əvvəl Samsung və Google şirkətləri Play Protect adlı zərərli proqram skan sistemindəki xəta ilə gündəmə gəlmişdi. Belə ki, bu sistem Samsung tətbiqlərini o cümlədən, Wallet, Messages kimi tətbiqləri zərərli olaraq işarələmişdi. Daha sonra isə google bu problemin sadəcə xətadan ibarət olduğunu bildirib.
