Amperex Technology və CATL-nin törəmə şirkəti olan Ampace Las-Veqasda keçirilən RE+ ticarət sərgisində 15.000 şarj və deşarj dövrünə tab gətirə bilən litium batareyasını təqdim etdi. Belə batareyalar günəş enerjisi istehsal sistemlərində “günəş fermalarının” ömrü boyu müşayiət edə bilər. Bu isə təqribi 20-25 ilə bərabərdir. Yekunda isə uzunmüddətlilik görülən işin layihə xərclərini ciddi şəkildə optimallaşdıraraq texniki xidmətin 30% və ya daha da çox azaldılmasına kömək edir.
Elektrik batareyasının ölçüləri 22,5 × 122,7 × 360,5 millimetrdir. Bu ölçüdə bir batareyanın çəkisi isə təxminən 1,8 kiloqram təşkil edir. 15.000 şarj perioduna davamlı litium batareyanın maksimum gücü 100 Ah-a çatır və nominal gərginliyi 3,2 V səviyyəsondə olaraq qeyd edilir. İddia edilən batareyanın zəmanət təmin edilmiş ömrü 20 ilə qədər və ya 15.000 şarj dövrüdür. Yalnız bu qədər zaman keçdikdən sonra batareya öz məhsuldarlığını itirməyə başlayır.
Texniki nəzərən baxsaq batareya 20.000 dövrə qədər orijinal tutumunun təxminən 80%-ni qoruyur. 20.000 şarj və boşalma dövründən sonra isə yenə uzun bir müddət 70%-dən çox həcmdə sabit qalır. Əgər bilmirsinizsə qeyd edək ki, batareyanın optimal kondisiyası zəmanət verilən period ərzində maksimum 20%-lik tutumunu itirməsidir. 15.000 şarj perioduna davamlı batareyanın performansı təsdiqlənərsə o, bərpa olunan elektrik enerjisi istehsalı üçün uzunmüddətli enerji saxlama və elektrik enerjisi sistemlərini əhəmiyyətli dərəcədə gücləndirəcəkdir. Növbəti hədəf isə elektromobillərə bu batareya texnologiyasının inteqrasiyası olacaqdır.
Sonda yenə qeyd edək ki, Ampace, Çin istehsalçısı Amperex Technology Limited (ATL) və Çində yerləşən batareya nəhəngi CATL arasında birgə müəssisədir. CATL 2011-ci ildə ATL-dən ayrıca şirkət kimi yaradılıb. Bu gün CATL şirkətinin özü BMW, Daimler AG, Hyundai, Honda, Li Auto, NIO, PSA, Tesla, Toyota, Volkswagen, Volvo, XPeng üçün elektrik batareyaları istehsal edir.
