Artıq uzunmüddətdir ki, alimlər naqilsiz enerji ötürmək üçün texnologiya axtarışındadır. Bu texnologiya Nikola Teslanın xəyalı idi. DARPA Nikola Teslanın xəyalını reallaşdıraraq naqilsiz enerji ötürmə infrastrukturu yaratmağı planlayır. ABŞ müdafiə nazirliyinin tabeliyində olan DARPA qurumu naqilsiz enerjini ötürə bilmək üçün lazer texnologiyalarından istifadə edəcək. Qeyd edək ki, DARPA qurumunun əsas məqsədi ABŞ ordusunun mazot və digər maye yanacaqlardan asılılığını aradan qaldırmaqdır. Əgər bu reallaşarsa onda ABŞ ordusu dünyanın istənilən yerində elektrik problemi çəkməyəcək. ABŞ ordusunun polkovniki Paul Calhoun öz müsahibəsi zamanı qeyd edib ki, ABŞ ordusu müasir dövrdə dünyanın müxtəlif ərazilərində yerləşdiyi üçün artan enerji tələbi məhz yeni texnologiya hesabına ödəniləcək.
Bildirilir ki, adaptiv optika, yüksək enerjili lazerlər və hündürlükdə yerləşən elektrik hava platformaları ilə bağlı ciddi irəliləyişlər əldə edilib. Paul Calhoun həmçinin DARPA naqilsiz enerji ötürmə layihəsi barədə də məlumat verib. Onun sözlərinə görə layihə çərçivəsində DARPA, minimal enerji itkisi ilə atmosferin yuxarı hissəsindəki lazerlər vasitəsi ilə enerji ötürməyi hədəfləyir. Bu layihədə ən önəmli məsələ yerdəki enerjinin atmosferdəki lazerlər vasitəsi ilə çevrilməsi və ötürülməsidir. Məhz bu məsələni həll etmək üçün DARPA qurumu inqilabi texnologiya axtarışındadır. Atmosferin yuxarı hissəsindəki lazer enerjiləri isə uzunömürlü peyklər və PUA-lar vasitəsi ilə təşkil ediləcək.
Əgər DARPA naqilsiz enerji ötürmə layihəsini reallaşdırarsa bu, texnologiya tarixində inqilabi yenilik ola bilər. Belə ki, bu yenilik yalnız ABŞ ordusu üçün deyil, texnologiyanın müxtəlif sahələri üçün inqilab olacaq. Gələcəkdə texnologiya şirkətləri öz cihazlarında bu texnologiyadan istifadə edə bilər. Ən önəmlisi artıq enerji xəttlərinə ehtiyac qalmayacaq. Dünyanın istənilən ərazisində enerji əldə etmək mümkün ola bilər.
