Süni intellektə qarşı olan məhdudiyyətlər gün keçdikcə çoxalır. Dünyanın texnologiya nəhənglərindən biri olan Samsung işçilərinə ChatGPT kimi süni intellekt alətlərindən istifadə etməyi qadağan edib. Bu qərar yalnız şirkətin cihazları üçün keçərlidir. Yəni işçilər şirkətə məxsus cihazlarda süni intellekt alətlərindən istifadə edə bilməyəcək. Samsung işçilərə öz şəxsi telefonlarında bu tərz alətlərdən istifadə edərkən diqqətli olmağa çağırıb. Görünən odur ki, Samsung şirkət məlumatlarının üçüncü şəxslərin əlinə keçməsindən narahatdır. Ötən günlərdə şirkət işçiləri arasında sorğu keçirmişdi. Sorğu nəticəsində məlum olub ki, işçilərin 65%-i süni intellekt alətlərini şəxsi məlumatların sızdırılmasında potensial təhlükə hesab edir.
Samsung şirkətinin işçiləri bu gün ChatGPT, Google Bard və Microsoft Bing kimi süni intellekt alətlərindən istifadə etməməli olduqları ilə bağlı mail alıblar. Təbii ki, Samsung şirkəti şirkət məlumatlarının üçüncü tərəflərə ötürülməsi ilə bağlı narahatlıq keçirir. Hətta şirkət işçilərinə süni intellekt əsaslı chatbotlardan da istifadə etməməyi xahiş edib. Qeyd edək ki, Samsung şirkəti işçilərə şəxsi cihazları vasitəsi ilə şirkət məlumatlarını və şəxsi məlumatlarını paylaşmağı qadağan edir. Hətta bu qadağaya əməl etməyənlər işdən çıxarılmaq ilə bərabər ciddi cəza ödəməli olur.
Samsung şirkətinin ChatGPT və digər süni intellekt vasitələrinə qarşı olan narahatçılığını başa düşmək olur. Çünki, bir çox texnoloji şirkət OpenAI şirkətinin süni intellekt alətlərinin təhlükəsizliyindən narahatdır. Hətta OpenAI şirkəti özü də bu narahatlıqların fərqindədir. Məhz bu səbəbdən OpenAI ötən günlərdə bildirdi ki, tərtibatçılara dil modelini tətbiq etmək üçün söhbət məzmununun istifadəsini bloklamağa imkan verən “gizli” xüsusiyyət təqdim olunub.
