Qışın özünü hiss etdirməyə başladığı bu günlərdə Çin texnologiya şirkəti olan Xiaomi yeni ağıllı şərf modelini təqdim edib. Belə ki, gündəlik həyatda istifadə olunan məhsulları ağıllı cihazlara çevirən şikət yeni ağıllı şərfini artıq satışa çıxarıb. Qeyd edək ki, yeni ağıllı şərf modelini ilk dəfə şirkətin Baş İcraçı Direktoru olan Lei Jun şəxsi Weibo hesabında elan edib. Yeni ağıllı şərf, DuPont istilik izolyasiya materialı ilə hazırlanıb və sadəcə 3 saniyəyə isinə bilir.
Xiaomi brendinin yeni ağıllı şərf modeli hansı xüsusiyyətlərə malikdir?
Xiaomi yeni ağıllı şərfi dizayn cəhətdən sadə şərflərdən fərqlənir. İlk növbədə şərf olmasından əlavə bel isidicisi kimi də bundan istifadə edə bilərsiniz. Belə ki, şirkət yüksək gərginlik, qısaqapanma, partlama, həddindən artıq istiləşmə risklərinə qarşı tədbir görüb və yeni şərf modelini olduqca qalın dizaynda hazırlayıb. Həmçinin bildirək ki, sadaladığımız risklərdən hərhansı biri baş verərsə yeni ağıllı şərf dərhal sönür. Qeyd etdiyimiz kimi, yeni ağıllı şərf modeli 3 saniyəyə isinə bilir. Həmçinin yeni model 3 fərqli temperatur rejiminə sahibdir. Uyğun olaraq 38 dərəcə, 45 dərəcə və 50 dərəcəyə qədər isinməsi mümkündür. Şərfin daxilində quraşdırılmış temperatur sensoru istiliyi ölçür və lazımi dərəcədə istiliyi təmin edir. Yeni ağıllı şərfin ən iddialı xüsusiyyətlərindən biri su keçirməməsi və paltaryuyan maşında rahatlıqla yuyula bilməsidir.
Xiaomi brendi yeni ağıllı şərf modelinin qiymətini Çin bazarında 149 yuan və ya 21 dollar olaraq təyin edib. Hal-hazırda isə Çinli alıcılar Youpin veb saytı vasitəsi ilə ağıllı şərfi ala bilər. Əlavə olaraq qeyd edək ki, Xiaomi ağıllı şərfi 5000 mAs həcmli powerbank ilə bir yerdə təklif edir. Nəticədə bu cihaz içərisinə taxıb-çıxara biləcəyiniz powerbank ilə işləyir. 5000 mAs isə 7 saata qədər işləməsi üçün kifayətdir. Lakin pulsuz powerbank yalnız ilkin sifariş zamanı keçərlidir. Yəni daha sonra powerbank üçün əlavə ödəniş lazım ola bilər.
