Xiaomi ötən gün yeni ağıllı saatı Watch S3 modelini dəyişdirilə bilən çərçivə, e-sim dəstəyi və HyperOS interfeysi ilə təqdim edib. Görünən odur ki, Çinli texnologiya nəhəngi bu dəfə ağıllı saatını tamamilə fərqli arxitekturada hazırlayıb. Qeyd edək ki, yeni ağıllı saatlar Xiaomi 14 seriyalı smartfonlar ilə birlikdə təqdim edilib. O cümlədə texnologiya nəhəngi bir müddət əvvəl gündəm mövzusu olan HyperOS əməliyyat sistemini də təqdim edib.
İlk öncə onu qeyd edək ki, yeni Xiaomi Watch S3 ağıllı saatı 1.43 düymlük AMOLED ekrana malikdir. O cümlədən 600 nit parlaqlığa sahib olan ekranın yenilənmə tezliyi də 60Hz olaraq müəyyən olunub. Bütün bu xüsusiyyətlər normal ağıllı saatlardakı ilə eyni olsa da, Xiaomi yeni modelində fərqliliklər də edib. Belə ki, istifadəçilər dəyişdirilə bilən çərçivə xüsusiyyəti vasitəsi ilə ağıllı saatlarının görünüşünü rahatlıqla dəyişə biləcəklər. Maraqlısı budur ki, hər çərçivə üçün də müxtəlif rənglərdə kəmərlər mövcuddur. Yəni siz yeni Watch S3 ağıllı saatına sahib olmaqla onun dizaynını özləri təyin edə biləcək.
Bütün bu dizayn yeniliklərindən əlavə ağıllı saata 20% daha həssas 12 kanallı ürək döyüntüsü sensoru daxildir. Bu sensor həmçinin qandakı oksigen miqdarını ölçmək, yuxu keyfiyyətini, stress səviyyəsini və tənəffüs dərəcəsini izləmək xüsusiyyətlərinə də malikdir. Həmçinin yeni saatda 150-dən çox idman rejimi də yer alır. Xiaomi batareya ömrünün 15 günə qədər ola biləcəyini də açıqlayıb. Habelə yeni saatda NFC modulu da yer alır. Ağıllı saatın adi versiyası 110 dollar, e-SIM versiyası isə 135 dollar qiymət etiketinə sahibdir.
