Honor bu dəfə texnologiya aləmində daha bir yenilik edir. Belə ki, yeni Honor Magic 6 modelini göz ilə idarə etmək mümkün olacaq. Yeni təqdim edilən Snapdragon 8 Gen 3 çipsetindən güc alacaq, flaqman smartfon performans və süni intellekt tərəfində bizlərə yüksək imkanlar təklif edəcək. Qeyd edək ki, yeni smartfon Apple şirkətinin iPhone modellərində istifadə etdiyi dinamik adaya sahib olacaq. O cümlədən bu dinamik ada göz ilə idarə xüsusiyyətinin əsasını təşkil edir. Süni intellekt selfie kamerası vasitəsi ilə istifadəçilərinin gözünü izləyəcək.
İstifadəçilər Magic Capsule-dakı tətbiqlərə sadəcə baxmaqla telefona toxunmadan tətbiqləri aça biləcək. Sosial mediada ortaya çıxan videoda da əks olunduğu kimi, yeni sistem bir çox vəziyyətdə həyati önəm də daşıyacaq. Lakin yenə də istifadəçiləri maraqlandıran ən əsas məsələ məxfilik və təhlükəsizlikdir. Həmişə açıq olan kamera hakerlərin əlinə keçərsə istifadəçilərin məxfiliyi və təhlükəsizliyi pozula bilər. Ümumiyyətlə Honor şirkəti Huawei çətiri altında yaransa da, ABŞ-embarqosundan sonra Huawei Honor şirkətini özündən ayırmaq məcburiyyətində qalmışdı.
Honor CEO-su Zhao Ming bildirir ki, Honor brendi hazırda daha yüngül və nazik cihazlar təqdim etməklə rəqiblərindən bir addım önə keçməyə çalışır. Məhz şirkətin yeni texnologiya axtarışında olması da, əvvəllər Huawei çətiri altında olmasından qaynaqlanır. İndi şirkət özünəməxsus dizayn və texnologiya ilə bazarda yeni nüfuz əldə etməyə çalışır. Görünən odur ki, Honor bunu yeni süni intellekt əsaslı texnologiyaları ilə əldə edəcək.
