Son dövrlərdə populyarlaşan üçə qatlanan smartfon trendinə Çinli smartfon nəhənglərindən biri olan Xiaomi şirkəti də qoşula bilər. Belə ki, şirkətin aldığı patentin görüntüləri ortaya çıxıb.
Ümumiyyətlə, bu yaxınlarda xüsusilə Huawei brendinin Mate XT Ultimate modeli böyük maraq doğurub. Belə ki, Huawei Çində bu modeli ilə 6 milyondan çox ön sifariş əldə etməyi bacarıb. Nəhayət məlum olub ki, Xiaomi şirkəti də üçə qatlanan smartfon üçün patent müraciəti edib. Çinin Milli Əqli Mülkiyyət İdarəsi tərəfindən dərc edilən patent çertyojları mümkün üçə qatlanan Xiaomi smartfonu barədə məlumat verir. Bildirilir ki, patent 2022-ci ilin dekabrında dərc edilib və o vaxtdan bəri gizli saxlanılır.
Xiaomi əvvəllər üçə qatlanan smartfonu patentləşdirmişdi, lakin bu patent tətbiq oluna bilməyən dizayna malik hesab olunur. Yeni patent Huawei Mate XT Ultimate ilə eyni əsas planı izləyir. Belə ki, bu patent Z şəklində qatlanan və tək ekranı olan dizayna sahibdir. Smartfon qatlandıqda isə bu ekranın sadədə üçdə biri istifadə olunur. Keçən ay ortaya çıxan söz-söhbətə görə, bu üçə qatlanan smartfon Xiaomi Mix seriyasının bir hissəsi olacaq. Bununla belə, bunun yeni Mix Fold və ya ayrıca seriya olacağı hələ dəqiq deyil. Huawei və Xiaomi ilə yanaşı, Samsung, Tecno və TCL kimi şirkətlər də üçə qatlanan smartfonlar üzərində işləməyə başlayıb.
