Ötən gün Çinin texnologiya nəhənglərindən olan Xiaomi yeni Pad 6 Max və Band 8 Pro modellərini təqdim edib. Qeyd edək ki, çinli brend bundan əlavə Mix Fold 3 və Redmi K60 Ultra modelini də təqdim edib. Tədbirin ən diqqət çəkən modeli isə məhz Xiaomi CyberDog 2 olub. Lakin biz bu məqaləmizdə Pad 6 Max və Band 8 Pro modellərindən bəhs edəcəyik. Artıq Samsung brendinin yüksək performanslı Galaxy Tab S9 Ultra modelinə daha bir rəqib bazara çıxıb. Metal korpusu və zərif dizaynı ilə yeni model diqqətləri öz üzərinə cəlb edə bilib.
Bundan əlavə Xiomi Band 8 Pro modeli də sələfində olduğu kimi düzbucaqlı dizayna sahib olub. Xatırladaq ki, Xiaomi ilk dəfə Band 7 Pro modelində bu dizayna keçid etmişdi. Ənənəvi olan oval dizayndan düzbucaqlı dizayna keçid etmişdi. Bu isə ağıllı qolbağın saata bənzəməsinə imkan verirdi. Bu dizayn bəzi istifadəçilər arasında mübahisəyə də səbəb olmuşdu. Lakin Xiaomi mübahisələrə baxmayaraq daha böyük ekranlı və yenilənmiş funksiyalara sahib olan qolbaq təqdim edib.
Xiaomi brendinin yeni Pad 6 Max modeli bizə nələr vəd edir?
Yeni Pad 6 Max planşeti iPad Pro modellərini xatırladan zərif dizayna sahib olub. İncə çərçivələri və yüksək ekran-gövdə nisbətinə sahib olan model Samsung və Apple ilə ciddi rəqabətə girəcək. Bundan əlavə qeyd edək ki, Pad 6 Max modeli 14 düymlük 2K təsvir ölçülü LCD ekran panelinə sahibdir. Həmçinin ekran yenilənmə tezliyi də 144 Hz-dir. Xiaomi brendinin yeni flaqman modeli öz gücünü Snapdragon 8+ Gen 1 çipsetindən alır. Planşetin ən diqqət çəkən funksiyaları isə ön kamerada olan ağıllı məxfilik qorunması, ToF sensoru və digərləridir.
Qeyd edək ki, yeni ToF sensoru vasitəsi ilə planşetin ekranı hər dəfə siz ekrana baxdıqda avtomatik açılır, həmçinin siz planşetdən uzaqlaşdıqda ekran sönür. Bundan əlavə hərhansı tətbiq sizin kamera və mikrofonunuzdan istifadə edərsə planşet sizə xəbərdarlıq edəcək. Dolby Atmos dəstəyinə sahib olan 8 dinamik ilə təchiz edilən planşet güclü kameraya da sahibdir. belə ki, planşet 50 MP əsas və 2 MP dərinlik sensoru olmaqla 2 kamera sensoru ilə təchiz edilib. Ön tərəfdə isə bizi 30 MP kamera qarşılayır. Batareya tərəfində isə planşet 67 Vatt sürətli şarj dəstəkləyən 10000 mAs batareya həcminə sahibdir. Android 13 əməliyyat sisteminə sahib olan planşet 8-256GB, 12-256GB, 12-512GB və 16-1TB yaddaş seçimləri ilə təklif olunur. Planşetin qiymətləri isə müvafiq olaraq 523, 550, 605 və 660 dollar təşkil edir.
Xiaomi brendinin yeni Band 8 Pro modeli bizə nələr vəd edir?
Ötən gün təqdim edilən modelərdən biri də yeni Band 8 Pro ağıllı qolbağıdır. Qeyd etdik ki, yeni model sələfindən fərqli olaraq daha böyük ekrana sahib olub. Lakin dizayn olaraq Xiaomi heç bir dəyişiklik etməyib. Yeni ağıllı qolbağın AMOLED ekranı 1.74 düym olub. Həmçinin 360 ppi piksel sıxlığına və 60 Hz yenilənmə tezliyinə sahib olan ekranın maksimum parlaqlığı 600 nit təşkil edir. Bundan əlavə apple watch modellərində çox istifadə olunan Always On Display dəstəyi də bu ağıllı qolbaqda mövcuddur.
Xiaomi yeni Smart Band 8 pro modelinin yalnız ekranını deyil batareyasını da təkmilləşdirib. Belə ki, qolbağın batareya ömrü 14 günə qədər artırılıb. Bu göstərici Band 7 Pro modelində 12 gün idi. Lakin Always On Display funksiyası aktiv olarsa batareya ömrü 6 günə qədər azala bilər. Yeni ağıllı qolbaqda GPS və SpO2 sensorları mövcuddur. Bu isə istifadəçinin ürək döyüntüsü, stress səviyyəsi, qandakı oksigen miqdarını və yuxu keyfiyyətini ölçməyə imkan verir. 150 dən çox idman rejiminə və suya dayanıqlılıq sertifikatına sahib olan modelin çəkisi 22.5 qram qalınlığı isə 9.99 mm təşkil edir. Qiymət tərəfində isə yeni ağıllı qolbaq Çində 55 dollara təklif olunacaq. Hələlik modelin qlobal versiyasının nə vaxt satışa çıxarılacağı məlum deyil.
