Ötən günlərdə Berlində baş tutan təqdimat zamanı rəsmi olaraq təqdim edilən Xiaomi 13T seriyası artıq Azərbaycanda debüt edib. Belə ki, 28 Sentyabr tarixində yeni smartfon seriyasının təqdimat mərasimi baş tutub. Tedroid medianın da iştirak etdiyi tədbirdə yeni smartfon seriyasının ölkəmizdəki rəsmi satış qiymətləri də məlum olub. Ümumiyyətlə təqdimatda Xiaomi LEICA kameralarının gücündən və performansından çox bəhs edib. Onu da qeyd edək ki, seriya Xiaomi 13T və Xiaomi 13T Pro modellərindən ibarətdir.
Azərbaycanda debüt edən Xiaomi 13T seriyası olduqca iddialıdır. Belə ki, Xiaomi 13T modeli 256GB-a qədər yaddaş seçimi ilə təklif olunan Dimensity 8200-Ultra çipseti ilə təchiz olunur. Xiaomi 13T Pro modeli isə 1TB-a qədər təklif edilən daha güclü Dimensity 9200+ çipsetinə malikdir. O cümlədən 6.67 düymlük OLED ekran paneli və 50 MP Sony IMX 707 sensoru smartfonun əsas xüsusiyyətləri arasındadır. Xiaomi 13T, 67 Vatt sürətli şarj ilə 5000 mAs batareyaya malikdir. 13T Pro kimi sürətli deyil, lakin əksər insanlar üçün olduqca yaxşıdır. Çünki, Xiaomi 13T Pro modelində 5000 mAs batareya və 120 Vatt sürətli şarjı dəstəkləyir.
Qiymət tərəfində isə Xiaomi 13T modeli 12-256GB yaddaş seçimi ilə 1399.99 manata, Xiaomi 13T Pro isə 12-512GB yaddaş seçimi ilə 1799.99 manata təklif olunur. O cümlədən smartfonu Xiaomi şirkətinin rəsmi mağazalarından əldə etmək mümkündür. Hətta smartfonu 8 Oktyabr tarixindən əvvəl əldə edənlər xüsusi Xiaomi cihazlarını hədiyyə olaraq əldə edə biləcəklər.
