Aylar bir-birini sürətlə əvəz etdiyindən bu ili də tamamlamağımız üçün çox az bir müddət qalıb. Nəticədə il sonuna doğru yaxınlaşırıq və bizi qarşıda yeni təqdimat tədbirləri gözləyir. Belə ki, təqdimat tədbirləri üçün tələsənlərdən biri də Xİaomi şirkətidir. Təqdimata ortalama olaraq 2-3 ay qalmış Xiaomi 13 Pro modelinin artıq hazır olduğunu təsdiqləyən ilk canlı görüntüsü Çinli mənbələr tərəfindən sızdırılıb. Beləliklə smartfon barədə bəzi detallar bu görüntü hesabına məlum olub.
Xiaomi 12 Pro ilə bənzər dizayna malik davam modeli 1 il tamam olmadan çıxarıla bilər
İddia edilən məlumatlara əsasən, bütün brendlər Snapdragon 8 Gen 2 ilə çıxacaq smartfonlarını tezləşdirməyi düşünürlər. Ötən həftə paylaşdığımız OnePlus 11 Pro modelinin render görüntüləri də şirkətlərin artıq yeni nəsil üçün hazır olduğunu göstərir. Hətta Xiaomi 13 Pro modelinin ilk canlı görüntüsü də bizə Snapdragon 8 Gen 2 barədə məlumat verir. “Kailua” kod adına sahib Snapdragon 8 Gen 2 çipsetinin rəsmi olaraq bu cihaza quraşdırıldığı görüntü ilə bir daha dəqiqləşir. Eyni zamanda Snapdragon 8 Gen 2 çipsetinin ən yüksək tezliyinin də 3.0GHz olduğu müşahidə edilir.
Xiaomi 13 Pro modelinin kod adı isə əvvəlcədən sızdırılan “nuwa” və “fuxi” ikilisi ilə uyğun gəlir. Hansı ki, “fuxi” kod adı sadə Xiaomi 13 modelinə aid, olub “nuwa” kod adı isə şəkildən də gördüyünüz Xiaomi 13 Pro modelinə aiddir. Xiaomi 13 Pro modelinin canlı görüntüsü istinadən smartfonu Xiaomi 12 Pro ilə müqayisə etdikdə heç bir ciddi dəyişiklik olmadığını müşahidə etmək olur. Bu da əvvəlcədən gələn məlumatların doğruluğunu təsdiq edir.
Həmin məlumatlar isə bir müddət əvvəl sizinlə bölüşdüyümüz Xiaomi 13 Pro modelinin öz sələfi ilə eyni, lakin Xiaomi 13 modelinin tamamilə fərqli gövdə alacağı ilə bağlıdır. Əgər xatırlayırsınızsa, bir neçə həftə əvvəl Xiaomi 13 modelində Galaxy S23 modeli kimi minimum çərçivəli düz ekran paneli işlədiləcəyini bildirmişdik. Sadə Xiaomi 12 qıvrımlı ekran panelinə sahib olsa da Xiaomi 13 modelində bu hal dəyişməlidir. Çox təəssüf ki, Xiaomi 13 modelinin görüntüsü hələlik sızdırılmadığı üçün bu məlumatı 100% əminliklə təsdiqləyə bilmirik.
Test variantı olan Xiaomi 13 Pro modelinə eyni zamanda Android 13 üzərinə MIUI 14 interfeysinin də yükləndiyi görünməkdədir. Yəni MIUI 14 interfeysi artıq tamamlanma mərhələsində hesab edilə bilər. Smartfonlar barədə qeyd edəcəklərimiz hələ ki, bu qədərdir. Yeni detallar böyük bir ehtimalla qarşıdakı həftələrdə sızdırılmış olacaq.
