Bu gün rəsmi olaraq Sony Xperia 5 IV modeli təqdim edilib. Smartfon ötən ilki modelin təkmilləşdirilmiş versiyasıdır. Dəyişiklik əsasən çipset, şarj texnologiyası və cüzi kamera modullarında müşahidə olunur. Əvvəlki Xperia 5 III modeli Snapdragon 888 çipsetindən öz gücünü alarkən, yeni Xperia 5 IV modelində isə Snapdragon Gen 1 çipseti quraşdırılıb. Qualcomm şirkətinin ən güclü Snapdragon 8+ Gen 1 çipseti heyif ki, bu modeldə mövcud deyil. Böyük bir ehtimalla satış ədədlərinin də aşağı olması buna səbəb yaradıb.
Sony Xperia 5 IV modeli hansı texniki xüsusiyyətlərə malikdir?
Sony şirkətinin yeni Xperia modeli 6.1 düymlük OLED “2520×1080 piksel” piksel təsvir ölçülü ekran ilə təmin olunub. Ekranın görüntü yeniləmə tezliyi 120Hz təşkil edir. Smartfonun ekran paneli 6.1 düymdür deyə kiçik gəlsə də 21:9 ekran nisbəti və qalın çərçivələri cihazın ölçüsünü xeyli böyük edir. Ön tərəfdə Gorilla Glass Victus qoruyucu şüşə mövcuddur.
Sony Xperia 5 IV modeli ənənəvi 1/1.7 düymlük 12MP təsvir ölçülü əsas kameraya sahibdir. Telefoto kamerası 1/2.9 düymlük 12MP sensorla gücləndirilib. 70mm və 105mm olmaqla 2 fərqli fokus məsafəsi hesabına 3 və ya 4.4 qat optik yaxınlaşdırma edə bilər. Arxa tərəfdəki son sensor isə 12MP təsvir ölçülü 124˚ baxış bucağına sahib ultra-geniş kameradır. Ultra-geniş bucaqlı kamera istisna olmaqla digər 2 kamera OIS dəstəyinə malikdir. ZEISS imzalı kameralar, ExmorRS obyektivləri ilə də gücləndirilib. Hər bir sensor üçün avtofokus dəstəyi mövcuddur. Selfi kamerası isə 8MP olub çox da güclü deyil, EIS dəstəyinə sahibdir.
Xperia 5 III ilə eyni ölçülərdə olmasına baxmayaraq, Xperia 5 IV modeli sələfi ilə müqayisədə 500 mAs daha böyük 5000 mAs həcmli batareya alıb. Sony şirkətinin sözlərinə, batareyanın istifadə müddəti minimum 3 il təşkil edir. Əlavə olaraq smartfon 30 Vt güclü sürətli şarj dəstəkləyir. 30 dəqiqəyə 50% şarj olmağı bacarır. İlk dəfə isə Xperia xəttində bu modelə simsiz şarj da quraşdırılıb.
IP68 sertifikatı səviyyəsində qorunan cihaz 3.5mm qulalıqlıq girişinə, MicroSD dəstəyinə və.s də malikdir. Dolby Atmos, HiRes Audio, 360 Reality Audio, DSEE Ultimate səs dəstəyi ilə gücləndirilmiş stereo səs dəstəyi vəd edir. Arxa qapaq da Gorilla Glass Victus ilə qorunur.
Qiyməti isə 1050 avro təşkil edir və yalnız 12-128 GB yaddaş variantına malikdir. Qeyd edək ki, bu qiymətə Samsung Galaxy S22 Ultra və çıxdıqdan sonra iPhone 14 Pro kimi premium üst seqment modellər almaq mümkündür. Nəticə etibarilə satış ədədləri yenə çox az olacaq.
