Hal-hazırda konsol bazarında ən populyar cihazlarından biri Sony PlayStation 5 modeldir. Yeni məlumatlara əsasən, oyun konsolu tamamilə yenilənib. Yenilənmiş komponentləri Austin Evans adlı YouTuber detallı açıqlayıb. O, yenilənmiş konsolu sökərək çox saylı dəyişiklikləri izləyiciləri ilə bölüşüb. Sony şirkəti yenilənmiş oyun konsolunda daha kompakt ana lövhə, təkmilləşdirilmiş soyutma sistemi və yenilənmiş SSD yuvası istifadə edib.
Yeni dəyişikliklər hesabına PlayStation 5 konsolunun çəkisini azaltmaq mümkün olub, lakin xarici görünüşdə dəyişikliklər olmayıb. Ən vacib dəyişiklik isə yenilənmiş ana lövhədir. Ölçüsü təxminən 5 sm kiçilib. Soyutma sisteminə isə əlavə bir istilik borusu quraşdırılıb və pərlər kiçildilib.
Sony oyun konsolunda nələri dəyişib?
Təqdim ediləndən etibarən Sony şirkəti ilk dəfədir ki, PlayStation 5 konsolundan soyutma sistemini başdan dəyişir. Ötən il daha kompakt pər ilə təkmilləşdirilmiş variantını hazırlamışdılar. Verilmiş məlumata əsasən, yeni ana lövhənin çəkisi 400 qram azalaraq 1100 qram olub.
Həmçinin ana lövhənin üzərində bəzi komponentlərin yerləri dəyişdirilib. Əsasən CMOS batareyası tam olaraq pərli soyutma sisteminin altında quraşdırılıb. Daha əvvəl əlçatan yerdə yerləşirdi və bunun hesabına batareyanın dəyişdirilməsi asan idi. İndi isə bu məsələ çətinləşib. Ümumilikdə PlayStation modelinin yeniliklə birlikdə 1000, 1100 və 1200 olmaqla 3 variantı satışda qarşınıza çıxacaq.
Yenilənmiş Sony PlayStation 5 konsolunda SSD sərt diski metal lövhənin arxasında gizlədilib. Bunun hesabına isə soyutma sistemi daha effektiv işləməlidir. Bütün bunların timsalında oyun konsolunda olan dəyişikliklər enerji istehlakını 20-30 Vt azalıb. Detallı məlumat üçün aşağıdakı video ilə tanış ola bilərsiniz.
Konsolda dəyişiklikləri göstərən Austin Evans (YouTube), bu addımların cihazın istehsal qiymətinə müsbət təsir göstərdiyini bildirib. Maraqlısı odur ki, Sony şirkəti hal hazırda bütün dünyada PlayStation 5 modelinin qiymətini artırıb. Göründüyü kimi şirkət qənaət etməsinə baxmayaraq, əlavə gəlirdən də imtina etmək fikrində deyil.
