Son illərdə uğurlu çipsetləri ilə diqqətləri cəlb edən Qualcomm yeni flaqman çipseti olan Snapdragon 8 Gen 3-ü təqdim etməyə hazırlaşır. Daha əvvəl Snapdragon 8 Gen 3 çipseti AnTuTu platformasında sınaqdan keçirilmişdi və rekord nəticə ilə uğura imza atmışdı. İndi isə Qualcomm şirkətinin yeni flaqman çipseti Snapdragon 8 Gen 3 məşhur Geekbench platformasında test edilib. Nəticədə yeni çipsetin sələflərindən daha üstün performansa sahib olduğu məlum olub.
Qualcomm şirkətinin yeni Snapdragon 8 gen 3 çipseti Geekbench 5 testlərindən uğurla keçib. Belə ki, Digital Chat Station ləqəbli insayder flaqman çipsetin ilkin nəticələrini Weibo-da paylaşıb. Çipset ilk növbədə NX7679J kod adlı Nubia smartfonunda sınaqdan keçirilib. Qeyd edək ki, bu smartfonun REDMAGIC 9 olacağı gözlənilir. Nəticədə isə flaqman çipset təknüvəli testdə 1596 xal, çoxnüvəli tetdə isə 5977 xal toplayıb. Xatırladaq ki, Snapdragon 8 Gen 2 çipseti müvafiq olaraq testlərdə 1485 və 5200 xal toplamışdı. Hətta sınaq zamanı istifadə olunan smartfon hələ inkişaf mərhələsində olduğu üçün çipsetin tam performans göstərə bilmədiyi deyilir. Smartfonun son versiyasında göstəricilərin müvafiq olaraq 1700 və 6600 olacağı iddia edilir.
Bundan əlavə bir çox analitik qeyd edir ki, yeni Snapdragon 8 gen 3 çipseti gözləniləndən baha olacaq və bu da smartfon qiymətlərini artıracaq. Hətta bu qiymət artımı səbəbindən bir çox texnologiya nəhəngi bu il bazara çıxan Snapdragon 8 gen 2 dən istifadə edə bilər. Təbii ki, daha bir seçim məhz MediaTek şirkətinin Dimenstiy çipsetlərindən istifadə etmək ola bilər. Xatırladaq ki, ötən aylarda Snapdragon 8 Gen 3 ilə rəqabət aparacaq yeni Dimensity 9300 çipsetinin hazırlanacağı barədə xəbər vermişdik.
