Bildiyimiz kimi, e-ink ekranlar göz sağlamlığına faydalı olmaqla yanaşı, həm də aşağı enerji sərfiyyatı ilə məşhurdur. Bu yeni ekran işləri bir addım irəli aparmaqla simsiz enerji qəbul edərək fəaliyyət göstərir. Beləliklə, artıq reklam və ya məlumat lövhələri simsiz enerji qəbul edən e-ink ekranlar ilə təchiz olunacaq.
Digital View simsiz enerji dəstəyi ilə 13,3 düymlük E Ink rəngli displeylərini təqdim edib. Bu ekranlar həm sağlamlığa faydalı, həm də aşağı enerji sərfiyyatına sahib olmaqla yanaşı qiymət tərəfində də digər displeylərdə daha ucuzdur. Yəni bu ekranlar təsviri göstərmək üçün əlavə güc tələb etmir, lakin yenə də ekranı yeniləmək üçün müəyyən enerji lazım gəlir. Yeni displey daxili batareyaları və ya xarici naqilli enerji təchizatını tamamilə aradan qaldıraraq tamamilə avtonom hala gəlib.
Yeni Digital View ESP6-13 displeyi, 1200 × 1600 piksel təsvir ölçülü 13,3 düymlük E Ink Spectra 6 rəngli ekrana malikdir. Parlaq işıqda yaxşı oxunan bu ekran, e-ink displeylər üçün yeni rəng və mürəkkəb səviyyəsi vəd edir. Tərtibatçı displeyləri möhkəm alüminium çərçivəyə yerləşdirib və hər birini daxili Wi-Fi, Bluetooth və USB-C interfeysləri ilə təchiz edib. Qurğunun ən mühüm xüsusiyyəti onun infraqırmızı diapazonda simsiz enerji təmin etmək qabiliyyətidir. Qeyd edək ki, bu ekran daha çox reklam və məlumat lövhələri kimi istifadə edilməsi üçün hazırlanmışdır. Habelə, cihaz lazım olan enerjini Wi-Charge adlı simsiz enerji modulundan alır. Wi-Fi bağlantısı, şəkil/məlumat axtarışı və yazı əməliyyatları üçün hər bir ekran üçün maksimum enerji istehlakının təxminən 500 mVt olduğu bildirilir. Gözləmə rejimində isə daha az enerji sərf olunur.
