Xiaomi 2024-cü ilin ikinci rübü üçün maliyyə məlumatlarını dərc edib. Beləliklə, Çinli texnologiya nəhənglərindən olan Xiaomi ilk dəfə olaraq avtomobil gəlirləri ilə bağlı da açıqlama verib. Gözləntilərini üstələyən şirkət avtomobil bölməsinin gəlirə qatqısını da açıqlayıb.
Xiaomi 2024-cü ilin ikinci rübü üçün maliyyə məlumatlarını dərc edib. Belə ki, Xiaomi ikinci rübdə 12,45 milyard dollar gəlir əldə etməklə analitiklərin 12 milyard dollarlıq gözləntilərini üstələyə bildi. Şirkət ötən illə müqayisədə gəlirlərini 32% artırıb. Şirkətin xalis mənfəəti 866 milyon dollar olub. 2021-ci ildə elektrikli avtomobil biznesinə girən və aprel ayında ilk SU7 modelini təqdim edən Çin nəhəngi, ikinci rübdə 27.307 avtomobil tədarük etdiyini açıqladı. Xiaomi-nin avtomobil bölməsi 869 milyon dollar qazanıb. Qazanc hesabatından sonra açıqlama verən Xiaomi prezidenti Lu Weibing şirkətin ilin sonuna qədər 120.000 elektrikli avtomobil çatdırmaq məqsədinə çatacağına əmin olduğunu söyləyib.
İyun ayından etibarən Xiaomi, aylıq tədarükü 10.000 ədədə çatdırmaq məqsədi ilə iki növbəli sistemə keçmişdi. Bununla belə, Xiaomi-nin avtomobil biznesi hələ də zərər etməyə davam edir. Belə ki, bu bölmə ikinci rübdə 252 milyon dollar zərər qeyd edib. Lu tədarüklərin artması ilə gəlirliliyin də yaxşılaşacağını bildirib. Qeyd edək ki, şirkət hazırda istehsal etdiyi hər avtomobil üçün təxminən 10 min dollar zərər edir. Bununla belə, qlobal smartfon bazarında uzunmüddətli durğunluqdan sonra ötən ilin sonundan etibarən bərpa əlamətləri müşahidə olunur. IDC tədqiqat şirkətinin məlumatına görə, Xiaomi-nin qlobal smartfon tədarükləri ikinci rübdə 27,4% artaraq 42,3 milyon ədədə çatıb. Şirkət 14,8% bazar payı ilə 3-cü yerdə qərarlaşıb.
