1978-ci ildə Shugart Technology adı ilə qurulan müasir Seagate şirkəti yeni 554mb/san oxuma sürətinə malik olan MACH.2 sərt diskini təqdim edib. Belə ki, dünyanın ən sürətli sərt diski 2 variantda istifadəçilərə təqdim olunub. Bunlar müvafiq olaraq 16TB və 18TB tutuma malik Exos 2X16 və 2X18 modelləridir. Bu sərt disklərin bu qədər sürətlə işləyə bilməsinin səbəbi yeni modellərin 2 müstəqil sürücü ilə təchiz olunmasıdır. Bu sürücülər vasitəsi ilə sərt diskin hər iki maqnit səthində paralel olaraq məlumat yazmaq mümkündür.
Seagate şirkətinin Exos seriyasının yeni modeli 2 versiyaya SATA və SAS versiyalarına malikdir. Şirkətin verdiyi məlumata görə isə SATA versiyasında olan sərt disk 545 MB/san, SAS versiyasında olan sərt disk isə 554 MB/san oxuma sürətinə malikdir. Hər iki sərt disk versiyasının orta gecikməsi 4.16 ms-dir. Həmçinin sərt disklərin keş həcmi 256 MB-dır. Əlavə olaraq qeyd edək ki, şirkətin əvvəlki nəsil Exos 2X14 modelinin oxuma sürəti 524 MB/san idi.
Yeni sərt disklərin enerji sərfiyyatına nəzər salsaq SAS və SATA versiyasında olan sərt disklərin müvafiq olaraq 8 Vatt və 7.8 Vatt enerji sərf etdiklərini müşahidə edərik. Onuda qeyd edək ki, Seagate şirkəti bu modelləri +5°C ilə +60°C temperatur aralığında işləməsi üçün nəzərdə tutub. Həmçinin şirkətin iddiasına görə bu sərt disklərin ömrü 2.5 milyon saatdır. Hələlik Exos 2X16 və Exos 2X18 sərt disklərinin qiyməti barədə məlumat verilməyib.
