Dünyanın ən böyük axtarış sisteminə sahib olan Google şirkətinin Google Pixel Fold smartfonuna aid olduğu iddia olunan görüntülər sızdırılıb. Belə ki, Front Page Tech(FPT) resursu bu barədə hesablarından paylaşım edib. Qeyd edək ki, şirkətin Google Pixel seriyasının ilk modeli 2013-cü ildə elan olunmuşdu. Seriyanın ən son modeli isə Pixel 7 və Pixel 7 Pro modelləridir. Hələ may aylarında şirkət Pixel seriyasının son modelini təqdim etdikdən sonra yeni qatlanan model barəsində hərkəs fikirlər irəli sürürdü. Hətta bəzi insayderlər şirkətin yeni modelinin Samsung Galaxy Z Fold 4 modeli kimi qatlanan versiyada olacağını demişdi və FPT mənbəsinin sızdırdığı görüntülər də bu fikiri qismən təsdiqləyir.
Front Page Tech resursu Google Pixel Fold smartfonunun görüntüləri ilə bərabər bir neçə texniki xüsusiyyətini də sızdırıb. Belə ki, yeni qatlanan smartfonun gələn ilin may ayında Google Pixel Tablet modeli ilə birlikdə təqdim olunması gözlənilir. Həmçinin smartfonun 2 rəngdə ağ və qara olmaqla təklif olunacaq.
Bu modelin Galaxy Z Fold 4 modelindən daha geniş olması gözlənilir. Əlavə olaraq isə cihazın hər iki ekran panelində 9.5MP kamera sensoru yerləşdiriləcəyi iddialar arasındadır. Bu sensorlardan biri xarici ekran panelində digəri isə daxili ekran panelində yerləşdiriləcək. Lakin qeyd etmək lazımdır ki, daxildəki ekranın alt və üst çərçivələri olduqca qalın olduğu üçün ən azından ilkin prototip renderlərində xoş hissiyat yaratmır.
Şirkətin Pixel seriyasının yeni modelinin adının Google Pixel Fold adlandırılması dəqiq deyil. Həmçinin mənbənin paylaşdığı görüntülər sadəcə sızıntıdan ibarətdir. Lakin böyük bir ehtimalla gələn il Google şirkətinin yeni qatlanan smartfonunun mütləq ki şahidi olacağıq. Bu smartfonun başlanğıc qiyməti isə 1800 dollar olması gözlənilir.
