Samsung-un yay aylarında keçirəcəyi tədbirdə sümük keçirici sistemli qulaqlıqları təqdim edəcəyi iddia edilib. Ümumiyyətlə, Cənubi Koreya mərkəzli Samsung brendi smartfonları ilə seçilsə də, eyni zamanda bir çox fərqli məhsul növü ilə gündəmə gələn bir şirkət hesab olunur. İndi ortaya çıxan yeni bir iddiaya görə, şirkət qulaqlıq sahəsində mühüm yeniliklər planlaşdırır.
İddialara görə, Samsung yayda təqdim edəcəyi Galaxy Z Fold və Flip 7 seriyaları ilə yanaşı qulaqlıq təqdim edəcək. Bu qulaqlıq isə sümük keçirici texnologiya ilə təchiz olunacaq. Qeyd edək ki, sümük keçiriciliyi hal-hazırda bir çox şirkət tərəfindən qulaqlıqlarda istifadə olunur. Sadə dillə desək, bu sistemə malik cihazlar səsi birbaşa kəllənizdəki sümüklər vasitəsilə ötürür və onu qulaq pərdəsi vasitəsilə ötürmək ehtiyacını aradan qaldırır. Hazırda Philips və Bose kimi bir çox şirkətdə bu tip qulaqlıqlar var.
Bu eşitmə üsulu, ətraf mühitin səslərini daha yaxşı eşitmək, çölə daha az səs yaymaq və qulaq problemlərini azaltmaq kimi üstünlüklərə sahibdir. Bununla belə, onu da qeyd etmək lazımdır ki, onun adi qulaqlıqlar qədər yaxşı səs verməməsi mənfi cəhətlərindən hesab oluna bilər. Samsung barəsində sızdırdığı məlumatları ilə məşhur olan Ice Universe bildirib ki, şirkət iyulda keçiriləcək tədbirdə sümük keçirici texnologiyaya malik “Able” kod adlı qulaqlıq təqdim edəcək. Təəssüf ki, cihaz haqqında paylaşılan bütün məlumatlar bunlardır.
