Məlum məsələdir ki, Samsung 2024-cü ilin əvvəlində buraxılması planlaşdırılan Galaxy S24 seriyası üzərində işləyir. Böyük bir ehtimalla yaxın həftələrdə Galaxy S24 seriyasına aid render görüntüləri və prototipləri belə sızdırılmış görəcəyik. Galaxy S24, Galaxy S24+ və Galaxy S24 Ultra modellərinin bir neçə gün əvvəl IMEI verilənlər bazasında peyda olması da bu halı gücləndirən detaldır. Lakin bütün bunlar kənarda dursun, insayderlər Samsung Galaxy S24 seriyası üçün şirkətin ən güclü ekrandan istifadə edəcəyini və bu ekranı iPhone 15 üçün Apple şirkətinə satmayacağını iddia edib.
Bildirilir ki, Samsung Galaxy S24 seriyasındakı bütün smartfonlar əvvəlki nəsildə istifadə edilən M12 OLED panellərindən daha nazik və daha az enerji sərfiyyatına malik M13 seriyalı OLED panellərlə təchiz ediləcək. Belə olduğu halda Apple-ın bu il bazara çıxaracağı iPhone 15 seriyasına məxsus smartfonların Samsung istehsalı M12 OLED panellər ilə gəlməsi gözlənilir. Bütün bu məlumatların timsalında Samsung Galaxy S24 seriyasının ən azı ekran baxımından iPhone 15 smartfonlarından bir addım öndə olacağını söyləmək olar.
Daha bir maraqlı fakt isə işlədiləcək operativ yaddaş (RAM)-ın artırılacağı barəsindədir. Böyük bir ehtimalla Apple şirkəti 2TB yaddaşa malik “Pro” modellərini təqdim edəcək. Samsung isə buna qarşılıq vermək üçün Galaxy S24 Ultra modelində RAM-ı 16GB həcminə çıxarmaqdan yana davranacaq. Təbii ki, Çinlilərin 24GB RAM dövrünə keçid etdiyini nəzərə alsaq 16GB RAM işlədilməsi 2TB yaddaş qədər effektiv təsirli deyil.
