Samsung bu dəfə sərfəli qiyməti və güclü texniki xüsusiyyətləri ilə diqqət çəkən Galaxy M35 5G modelini təqdim edib. Büdcə yönümlü bu model Galaxy M34 modelinin varisi olaraq bizlərə təqdim edilib. Gəlin görək yeni cihaz hansı xüsusiyyətlərə sahibdir?
![Samsung Galaxy M35](https://tedroid.com/media/2024/05/samsung-galaxy-m35-5g-teqdim.webp)
İlk olaraq qeyd edək ki, yeni Samsung Galaxy M35 5G modeli sələfindən fərqli olaraq daha böyük ekran, yeni çipset və stereo çıxış dəstəyi ilə gəlir. Büdcə yönümlü yeni smartfon 6,6 düymlük FHD+ təsvir ölçülü və 120 Hz yenilənmə tezlikli S-AMOLED ekrana sahibdir. Qeyd etməliyik ki, Gorilla Glass Victus tərəfindən qorunan bu panel, ekranaltı barmaq izi sensoru və 1000 nit-ə qədər parlaqlıq da təklif edir. Habelə panelin ortasında 13MP kamera sensoru da var.
![Samsung Galaxy M35](https://tedroid.com/media/2024/05/samsung-galaxy-m35-5g-teqdim-1-1024x576.webp)
Ön kameradan bəhs etmişkən, cihazın arxa tərəfindəki kamera xüsusiyyətlərinə də nəzər yetirək. Yeni Galaxy M35 modeli f/1.8 diyafram və OIS dəstəyi ilə 50MP əsas kamera, 8MP f/2.2 ultra geniş və 5MP makro kamera sensorları ilə təchiz edilib. Galaxy M34 modelindən fərqli olaraq yeni smartfon Exynos 1380 çipseti ilə qarşımızdadır. 8 GB RAM və 256 GB yaddaş seçimlərinə sahib olan cihazın yaddaşını microSD kart ilə 1 TB etmək də mümkündür. Ölçüləri 162,3 x 78,6 x 9,1 mm və çəkisi 222 qram olan Galaxy M35 5G 25Vt şarj sürətinə sahib 6000 mAs batareya ilə təchiz edilib. Cihaz qutudan One UI 6.1 əsaslı Android 14 əməliyyat sistemi ilə çıxacaq. Tünd Göy, Açıq Göy və Boz rəng seçimlərində satışa çıxarılacaq Galaxy M35 5G-nin 8 GB RAM və 256 GB versiyasının qiyməti 280 dollardan başlayacaq.