Ötən aylarda Rusiya öz texnologiya tarixində möhtəşəm uğura imza atdığını bildirmişdi. Belə ki, müxtəlif sanksiyalara məruz qalan Rusiya öz yerli smartfonu olan R-FON təqdim etmişdi. Hətta bu smartfon Rusiyanın yerli Rosa Mobile əməliyyat sisteminə sahib ilk smartfon da olmuşdu. Lakin indi ortaya çıxıb ki, Rusların öz yerli smartfonu olaraq təqdim etdiyi R-FON Banqladeş istehsalı olan eyni xüsusiyyətlərə malik cihaza çox oxşayır. Bu nüans isə cihaz barədə bir xeyli sualların meydana gəlməsinə səbəb olub.
Ümumiyyətlə Rusların ROSA əməliyyat sisteminə sahib ilk smartfonu R-FON Banqladeş istehsalı olan Symphony cihazı ilə eyni dizayna sahibdir. Hətta smartfonları sadəcə dizaynı deyil, texniki xüsusiyyətləri də bir-birinə bənzəyir. Belə ki, hər iki smartfon 6.7 düymlük ekrana sahib olub və MediaTek Helio G99 çipseti ilə təchiz edilib. O cümlədən 5000 mAs batareya və 128GB yaddaş da smartfonların ortaq xüsusiyyətlərindəndir. Lakin smartfonlar arasında bəazi fərqlər də mövcuddur. Belə ki, Symphony 6GB Ram və 108MP kamera sensoruna sahib olduğu halda R-Fon 8GB Ram və 50MP kamera sensoruna sahib olub.
Qeyd edək ki, R-Fon barədə detallar avqust ayında ortaya çıxmışdı. Habelə smartfonun ən vacib xüsusiyyətlərindən biri ROSA Mobile əməliyyat sisteminə işləməsi idi. Əgər biz Elektron kitabxanadan cihazın tanıtım məqaləsi və istehsalçısı ilə bağlı olan məlumatlara nəzər salsaq görərik ki, Hong Kong mərkəzli Bopel Mobile Technology Co Limited qeyd olunub. Bu ilin sentyabr ayında isə NTK IT Rosa yerli fabriklərdə R-FON istehsalına başlayıb. Görünən odur ki, Rusiya öz yerli smartfonu barədə bəzi detalları gizli saxlayıbmış.
