Xiaomi şirkətinə məxsus POCO brendi keçən il mart ayında POCO X3 Pro modelini təqdim etmişdi. Həmin model orta seqmentdə Snapdragon 860 çipseti təklif etdiyinə görə alıcıların marağını çəkməyi bacardı. POCO X3 Pro modelinin davamı olan POCO X4 Pro isə tamamilə fərqli “prinsiplərə” sahib bir cihaz oldu. Münasib qiymətə yüksək performans iddialarından tamamilə uzaq idi. Lakin bu gün təqdimat tarixi məlum olmuş Redmi Note 11T seriyası tam olaraq POCO X3 Pro “prinsiplərinə” xitab edir. Note 11T seriyası məhz münasib qiymətə yüksək performans axtaranlar üçün nəzərdə tutulub.
Note 11T seriyası hansı özəlliklərə sahib olacaq?
Redmi brendinin rəsmi weibo hesabından verilmiş məlumata görə təqdimat tədbiri 24 may tarixinə planlaşdırılır. Redmi Note 11T seriyası daxilində ən az 2 fərqli smartfonun satışa çıxarılması gözlənilir. Hansı ki, həmin smartfonlar Note 11T Pro və Note 11T Pro+ olaraq adlandırılacaq. Note 11T Pro modelinin özəllikləri demək olar tamamilə məlumdur.
Smartfon Dimensity 8100 çipsetindən güc alacaq. Dimensity 8100 çipseti ötən gün Honor 70 ilə bağlı xəbərdə də bəhs etdiyimiz kimi mükəmməl enerji sərfiyyatına malikdir. Performans cəhətdən Snapdragon 888 və Snapdragon 870 çipsetləri arasında özünə yer edir. Performans davamlılığı isə bu iki çipsetdən daha yaxşıdır. 4 ədəd 2.85GHz tezlikdə işləyən Cortex-A78 və 4 ədəd 2.0GHz tezlikdə işləyən Cortex-A55 nüvələrinə malikdir. Çipsetə Mali-G610 MC6 qrafik çipi quraşdırılıb. TSMC-nin 5nm istehsal prosesi üzərinə inşa olunub. Redmi Note 11T seriyasında şirkət eyni zamanda soyutma sisteminə də önəm verib. Ötən nəsillə müqayisədə buxar qazanının ölçüsü 32% böyüyəcək. 7 qatdan ibarət qrafit soyutma texnologiyası istifadə ediləcək.
Smartfona 144Hz tezlikli IPS LCD ekran paneli quraşdırılacaq. Bir çox insan əvvəlki cümlədə IPS LCD sözünü gördükdə heyfislənə bilər. Amma bu modelin nəyə görə çıxarıldığını unutmamaq lazımdır. Redmi Note 11T seriyası orta seqmentdə yüksək performanslı cihaz axtaranlar üçündür. Yüksək keyfiyyətli ekran axtarırsınızsa fərqli alternativlərə yönəlməyiniz məsləhət görülür. Redmi Note 11T seriyası kamera parametrləri cəhətdən də o qədər əla olmayacaq. 64MP əsas və 2 ədəd naməlum təsvir ölçülü köməkçi kameralar Note 11T Pro modelinə quraşdırılacaq. 5080mAh həcmli batareyası 67W sürətli doldurma dəstəkləyəcək.
Note 11T Pro+ modelinin üstünlüyü böyük bir ehtimalla 120W sürətli doldurma dəstəkləməsi ilə yaranacaq. Yerdə qalan texniki xüsusiyyətlərinin Note 11 Pro modelindən fərqlənməsi inandırıcı görünmür. Redmi Note 11T seriyasının qlobal bazara çıxarılıb-çıxarılmayacağı naməlumdur. POCO X4 GT olaraq təkrar brendləşdirilə bilər. Smartfonlar barədə daha dəqiq və ətraflı məlumat təqdimatdan sonra bilinəcək.
