Honor brendinin nisbətən münasib qiymətli Honor 50 seriyası yaxşı rəğbət qazanmışdı. Çünki, insanlar premium görünüşlü bu seriyaya aid modellərdə öz istədiklərini tapa bilirdilər. Kamera ideal idi, performans yetərli idi və xüsusilə Honor 50 Pro modelinin ekranı flaqmanlardan heç geri qalmırdı. Lakin Honor 60 seriyası öz sələfi ilə müqayisədə gözlənildiyi kimi uğurlu olmadı. Çipsetdən tutmuş kamera özəlliklərinə qədər ciddi bir yenilik gətirilmədi. Ona görə də Honor 70 seriyası modellərin təqdim edilməsinə həqiqətən ehtiyac var. Şirkətin rəsmi weibo hesabı üzərindən smartfonun təqdim tarixi ilə bağlı məlumat paylaşılıb. Eyni zamanda smartfonun dizaynı və bəzi texniki xüsusiyyətləri məlum olub.
Honor 70 seriyası bizə hansı yenilikləri gətirəcək?
Honor 70 seriyası barədə ən əhəmiyyətli yenilik özünü performans cəhətdən göstərəcək. Belə ki, seriya daxilində 3 model olması gözlənilir. Honor 70, Honor 70 Pro, Honor 70 Pro + olaraq adlandırılacaq cihazlar, uyğun olaraq 3 fərqli çipsetdən güc ala bilərlər. Həmin çipsetlərin Snapdragon 7 Gen 1, Dimensity 8100, Dimensity 9000 olacağı bildirilir. Bizə görə Dimensity 9000 çipsetinin Honor 70 seriyasında istifadəsi məntiqli görünmür. Performansı həddindən artıq yüksəkdir və bu seriya üçün qiyməti yersiz dərəcədə artıra bilər. Lakin digər 2 çipset, xüsusilə Dimensity 8100 çipseti mükəmməl seçim olacaqdır.
Redmi K40 modelində Dimensity 8100 çipsetinin göstərdiyi nəticələr möhtəşəm idi. Bu çipset ən az enerji sərf edərək, ən yüksək performans verən çipset kimi qeydə alınmışdı. Təəccüblüdür ki, performans davamlılığı Snapdragon 8 Gen 1 və Dimensity 9000 çipsetlərindən belə daha öndədir. Belə bir çipset yaxşı formada optimizasiya edilərək Honor 70 seriyası modellərdən birində quraşdırılsa insanların alması üçün yaxşı səbəb olacaq.
Kamera parametrləri cəhətdən də bu seriya ciddi irəliləmələr əldə edəcək. Sony istehsalı IMX800 seriyası 1/1.1 düymlük 50MP təsvir ölçülü kamera sensoru cihazlardan birində quraşdırıla bilər. Qəribə olan bir şey var. Tizer videosunda nümayiş etdirilən modelin arxasında 54MP yazısı həkk olunub. Bəlkə də IMX800 seriyası kamera sensorunun təsvir ölçüsü əslində 54MP olacaq. Amma 54MP yazısının yanında 1/1.49 düym ölçüsünün göstərilmiş olması sensorun fərqli olduğunu təsdiqləyir.
Smartfonlar 30 may tarixində təqdim ediləcək. Honor 70 seriyası barədə məlum olan detallar isə hələlik bunlardır. Daha ətraflı məlumat təqdimat tədbirindən sonra paylaşılacaq.
