Oppo şirkətinin yeni nəsil Find X6 seriyası barədə detallar nəhayət dəqiqləşdi. İnsayderlər tərəfindən qarşıdan gələn Oppo Find X6 seriyası eyni Oppo Find X5 seriyasında olduğu kimi 3 fərqli variantda təqdim ediləcək. Belə ki, cihazlar adlandırma baxımından Oppo Find X6 Pro və Oppo Find X6 adlandırılsa da texniki cəhətdən bir modelin 2 fərqli variantı olacaq. Söhbət, Oppo Find X6 Pro modelindən gedir. Bu cihaz Snapdragon 8 Gen 2 və Dimensity 9200 olmaqla 2 fərqli variantda qarşımıza çıxarılacaq. Sadə Oppo Find X6 modeli isə öz gücünü Snapdragon 8+ Gen 1 çipsetindən alacaq. Performansa təsir edən texniki detallar barədə son qeydləri etsək, Oppo Find X6 Pro modelinin Snapdragon 8 Gen 2 çipsetinə sahib variantı LPDDR5X operativ yaddaş və UFS 4.0 yaddaş həllinə sahib olacaq. Lakin digər bütün modellər LPDDR5 və UFS 3.1 texnologiyasına malik olacaq.
Oppo Find X6 seriyası barədə digər detallar kamera parametrlərinin mürəkkəb olduğunu ortaya qoyur
Seriyanın hər 3 fərqli variantında fərqli texniki xüsusiyyətlərə malik kamera konfiqurasiyası mövcuddur. Snapdragon 8 Gen 2 ilə gücləndirilmiş Oppo Find X6 Pro modelində 1 düymlük 50MP IMX989 sensoru ilə gücləndirilmiş əsas kamera ilə təchiz ediləcək. Bu cihazın kamera parametləri çox güclü olacaq. Çünki, OnePlus 11 modelinin əsas kamerasında olan 50MP IMX890 sensoru, Oppo Find X6 Pro modelində həm telefoto kamerası, həm də ultra-geniş bucaqlı kamerasında işlədiləcək.
Dimensity 9200 çipsetli variantın əsas kamerası 1 düymlük IMX989 əvəzinə, IMX890 ilə dəyişdiriləcək. Digər kamera detalları Snapdragon 8 Gen 2 çipsetli variantla eyni olacaq. Sadə Oppo Find X6 modelində də əsas kamera 50MP IMX890 sensoru ilə gücləndiriləcək. Lakin telefoto kamerası 50MP IMX763 ilə, ultra-geniş bucaqlı kamerası isə ISOCELL JN1 50MP ilə əvəzlənəcək.
Hər üç cihazda 3D ToF və Hasselblad tərəfindən quraşdırılan 13 kanallı rəng sensoru quraşdırılacaq. Ön tərəfdə yüksək keyfiyyətli RGBW IMX709 32MP selfi kamerası yerləşdiriləcək.
“Pro” modellər 120Hz tezlikli 6.82 düymlük Samsung E6 AMOLED ekran paneli ilə təchiz ediləcəklər. Sadə modelin isə 120Hz tezlikli 6.72 düymlük Tianma AMOLED ekran paneli əldə edəcəyi bildirilir. Cihazlar fevral ayında Çində anons edildikdən sonra, elə fevral ayının sonu MWC sərgisində qlobal bazara açıla bilərlər. Lakin Dimensity çipsetli variant Çinə özəl olaraq qalacaq.
