Arxasındakı işıqlarla diqqət çəkən OnePlus təsisçisinin yeni Nothing brendi ötən ay Nothing Phone (1) modelini anons etdi. Nothine Phone (1) modeli xeyli sevilsə də elə satışa çıxarılmasından 1 ay sonra alıcılar tərəfindən şikayətlər gəlməyə başladı. Bəziləri ekrandakı piksel yanıqlarından, bəziləri arxa panelə su sızmasından, bəziləri LED işıqların qopmasından öz narahatçılığını bildirirdi. Həmin xəbərlə saytımızdan tanış ola bilərsiniz. İndi isə sizlə birlikdə Nothing brendinin növbəti smartfonu barədə ortaya atılan bəzi iddialara nəzər yetirəcəyik. Belə ki, The Mobile Indian resursu tərəfindən şirkətin üzərində işlədiyi iddia edilən Lite Phone (1) modeli barədə yeni məlumatlar verilib.
Lite Phone (1) modelini ucuzlaşdırmaq bəzi xüsusiyyətlərin yox olması ilə nəticələnəcək
Nothing brendinin yeni smartfonun qiyməti bildiyimiz kimi gözləntilərin xeyli üzərində idi. Şirkət 8-128GB başlanğıc versiyası üçün Avropada 469 € qiymət etiketi təyin etmişdi. Yeni Lite Phone (1) modeli isə bundan müəyyən qədər ucuz olacaq. Ona görə də çox qəribə də olsa Nothing brendinə xas olan əsas xüsusiyyətlərin bu cihaza quraşdırılmayacağı deyilir. Söhbət, smartfonun arxasındakı LED işıqlardan gedir.
Mənbənin verdiyi məlumatda Lite Phone (1) modeli texniki cəhətdən Phone (1) modelindən çox fərqlənməməlidir. Nəticədə qiyməti azaltmaq üçün Nothing brendi, smartfona “əyləncə” qatan xüsusiyyətlərdən imtina etməyi seçib. Smartfonun arxa tərəfindəki işıqlar və naqilsiz şarj modulu iddialara görə zəiflədilmiş modelə quraşdırılmayacaq. Bunun əvəzinə arxada sadə şüşə qapaq istifadə ediləcək. LED işıqların və.s olmaması isə cihaza 5000mAs həcmində batareya yerləşdirməyə imkan verəcək. Hal-hazırda Phone (1) modelində 4500mAs həcmli batareya işlədilib.
Qutudan 42 Vt sürətli şarj adapteri çıxsa da doldurma sürəti Phone (1) ilə eyni, yəni 33 Vt olacaq. Yerdə qalan bütün detallar isə sabit qalacaq. Snapdragon 778G+ çipseti, 120Hz AMOLED ekranda heç bir dəyişiklik edilməyəcəyi deyilir. Smartfonun başlanğıc qiyməti mənbənin bildirdiyinə görə 24999 Rs. (310 €) təşkil edəcək. Qeyd edək ki, Nothing Phone (1) modelinin də qiymətinin 370 € səviyyələrinə düşməsi gözlənilir, lakin bu barədə də dəqiq bir informasiya hələlik mövcud deyil.
Lite Phone (1) modeli ilə bağlı sızdırılan detallar doğru olsa belə firmanın belə bir cihazı bazara çıxarması o qədər də məntiqli görünmür.
