iPhone 17 seriyasının uzun müddətdir gözlənilən və mübahisələrə səbəb olan dizaynı maket görüntüləri sayəsində məlum olub. Beləliklə, yeni ortaya çıxan görüntülər, seriyadakı bütün cihazların dizaynına həmişəkindən daha aydın bir görünüş verir.
Hər il olduğu kimi, Apple sentyabr ayında yeni flaqman iPhone modellərini təqdim edəcək. Apple həvəskarları yeni iPhone 17 seriyasının dizayn yenilikləri də daxil olmaqla bir sıra yeniliklərə sahib olmasını gözləyir. Bunların arasında ən diqqət çəkəni Plus-ı əvəz edəcək “Air” modeli olacaq. Habelə, bu dəfə bir neçə il aradan sonra Pro modellərin dizaynında da dəyişiklik görəcəyik. İndiyə qədər iPhone 17 ailəsi ilə bağlı çoxlu məlumatlar sızdırılıb. İndi isə bunlara daha yenisi və aydın olanı əlavə edilib. Texnologiya dünyasının aparıcı məzmun istehsalçılarından biri olan Sonny Dickinson iPhone 17 modellərinin maket şəkillərini paylaşıb.
Paylaşılan görüntülərə baxdıqda standart, Air, Pro və Pro Max modellərinin daxil olduğunu görə bilərik. Şəkillər bizə cihazların dizaynlarının necə ola biləcəyi barədə ətraflı məlumat verir. Habelə, yeni görütülərin əvvəlki sızmalarla uyğunlaşdığını da deyə bilərik. Pro modellərində telefonun bir ucundan digər ucuna qədər uzanan, sağda flaş və solda üçlü kamera kimi hissələri olan düzbucaqlı bir kamera adasının olacağı dəqiq görünür. Standart model iPhone 16 ilə oxşar olacaq. Sağdan ikinci sıradakı iPhone 17 Air modelinin maketi bütün söz-söhbətlərlə eynidir. Pixel-ə bənzər üfüqi kamera adasını görəcəyik. Cihaz “tarixdəki ən nazik iPhone” olacağı üçün tək kamera qurğusu ilə təchiz ediləcək. Başqa bir paylaşılan görüntüdə nə qədər incə olacağını bir daha görmək mümkündür. Hesablamalara görə, onun təxminən 5,5 mm qalınlığa sahib olması gözlənilir.
