Apple şirkətinin bu il təqdim etməyi planladığı iPhone 16 seriyası ilə bağlı daha bir məlumat ortaya çıxıb. Belə ki, daha əvvəl dizaynı məlum olan iPhone 16 seriyasının indi batareya həcmi barədə məlumat ortaya çıxıb. Görünən odur ki, Apple seriyanın Plus modelində bəzi ciddi dəyişikliklər edəcək. Hətta iPhone 15 Plus modelindən fərqli olaraq iPhone 16 Plus daha kiçik batareyaya sahib olacaq.
Ortaya çıxan yeni iddialara görə, iPhone 16, iPhone 16 Pro və iPhone 16 Pro Max modelləri iPhone 15 seriyasından daha böyük batareya həcminə sahib olacaq. Bununla belə, Apple şirkəti bu il Plus modelində daha aşağı həcmli batareya istifadə etməyi düşünür. Bir sözlə, iPhone 16 Plus bu il bizi batareya ömrü tərəfindən məyus edə bilər. Weibo-da paylaşılan iPhone 16 batareya tutumu təfərrüatları əvvəllər Majin Bu tərəfindən paylaşılan göstəricilər ilə eynidir. Lakin seriyanın flaqman iPhone 16 Pro modelinin batareya həcmi barədə ilk dəfə məlumat ortaya çıxıb.
| Model | Batareya həcmi | iPhone 15 seriyası | ||
| iPhone 16 | 3561 mAh | 3349 mAh (Standart) | ||
| iPhone 16 Plus | 4006 mAh | 4383 mAh (Plus) | ||
| iPhone 16 Pro | 3355 mAh | 3274 mAh (Pro) | ||
| iPhone 16 Pro Max | 4676 mAh | 4422 mAh (Pro Max) |
Bundan əlavə, iPhone 16 Pro və iPhone 16 Pro Max-ın əvvəlki modellərdən bir qədər böyük ekranlara sahib olacağı iddia olunur. Bu isə o deməkdir ki, batareya həcmində olan artım, daha böyük displeylərin əlavə enerji istehlakı ilə kompensasiya olunacaq. Ümumiyyətlə bu il Apple sadə modellərə olan marağı flaqman modellərə yönəltmək üçün əlindən gələni edir.
