Apple brendinin gələn il təqdim etməsi gözlənilən iPhone 16 seriyasının kamera xüsusiyyətləri barədə yeni məlumatlar ortaya çıxıb. Belə ki, texnologiya nəhəngi hələ iPhone 15 seriyasını təqdim etmədən ötən günlərdə iPhone 16 seriyasının ekran ölçüləri barədə məlumatlar ortaya çıxmışdı. Xatırladaq ki, Display Supply Chain Consultants analitiki Ross Young iPhone 16 Pro və iPhone 16 Pro Max modellərinin sələflərindən daha fərqli ekranlara sahib olacaqlarını iddia etmişdi. Ümumiyyətlə hər il yeni iPhone təqdim edilmədən əvvəl onun davamçısı barədə detallar ortaya çıxır. Maraqlısı budur ki, bu iddiaların çoxu gerçəkləşir.
İnsayderlər iddia edir ki, yeni iPhone 16 seriyasının artan ölçüsü onun daha böyük kamera sensorları ilə təchiz edilməsinə imkan verəcək. Hətta iPhone 16 və iPhone 16 Pro Max modellərinin periskop telefoto sensorları və 12% daha böyük sensorlar ilə təchiz ediləcəyi gözlənilir. Bu barədə Çinin weibo sosial şəbəkəsində də məlumatlar yayılıb. Xatırladaq ki, Ross Young yeni iPhone 16 seriyasının ekran ölçülərini də dəqiqliklə bildirmişdi. Hətta Young-a görə iPhone 16 Pro modeli 6.3 düymlük, iPhone 16 Pro Max modeli isə 6.9 düymlük ekrana sahib olacaq. Bu da o deməkdir ki, gələn il təqdim ediləcək iPhone modeli ən böyük ekrana malik iPhone olacaq.
Hal-hazırda bazarda olan iPhone 14 Pro və iPhone 14 Pro Max modelləri müvafiq olaraq 6.1 və 6.7 düym ekranlara malikdir. Qeyd edək ki, yeni iPhone 15 Pro modellərinin ekran ölçülərinin dəyişməyəcəyi bildirilir. Görünən odur ki, Apple şirkəti iPhone 16 Pro modellərini ən böyük ekran və ən böyük kamera sensorlarına malik iPhone edəcək. Maraqlısı budur ki, Apple sentyabrda təqdim edəcəyi iPhone 15 seriyasından sadəcə iPhone 15 Pro Max modelini periskop kamerası ilə təchiz edəcək. Lakin Apple bu strategiyanı 2024-cü ildə dəyişmək niyyətindədir. Texnologiya nəhəngi yeni Pro seriyasını periskop kamera sensoru ilə təchiz edəcək.
