Apple brendinin yaxın aylarda təqdim etməyi planladığı yeni iPhone seriyasından məlumatlar gəlməyə davam edir. Etibarlı mənbələrdən biri iPhone 16 Pro və iPhone 15 Pro modellərinin maketini yan-yana paylaşaraq onların dizayn fərqlərinə diqqət çəkib. Bu ilin sentyabr aylarında təqdim edilməsi gözlənilən iPhone 16 seriyası hazırkı flaqman iPhone 15 seriyasını əvəz edəcək.
Artıq bir müddətdir deyilirdi ki, Apple yeni seriyalarda köklü dizayn dəyişikliyi etməyəcək və son sızıntı bu iddiaları təsdiqləyir. iPhone 16 Pro və iPhone 15 Pro modellərinin maketlərini yanaşı gətirən mənbə onların dizayn fərqlərini ortaya çıxarıb. Nəticədə isə məlum olub ki, iPhone 16 Pro dizaynında minimal dəyişikliklər olacaq. Apple haqqında əvvəlki paylaşımları ilə özünə inam qazanan Majin Bu, iPhone 16 Pro ilə 15 Pro-nu müqayisə edən yeni paylaşımında daha bir çox detala da diqqət çəkib.
Şəkillərə baxanda görünür ki, iPhone 16 Pro modeli ilə iPhone 15 Pro arasındakı ən böyük dizayn fərqi əslində ekran ölçüsüdür. iPhone 16 Pro ilə ekran ölçüsünün 6,1 düymdən 6,3 düymədək artacağı bildirilir. Bu heç də inanılmaz böyük artım olmasa da, şirkət ekran ölçüsünün günümüzdəki smartfonlardan geri qaldığının fərqinə varıb deyə bilərik. Qeyd edək ki, daha əvvəl ekran ölçüsünün artması ilə yanaşı BSR texnologiyası sayəsində çərçivələrin daha incə olacağı da bildirilmişdi. Yeni paylaşılan şəkillərdə bununla bağlı heç bir məlumat verilməyib.
Digər tərəfdən, kamera bölməsində də kiçik dəyişikliklərin olduğunu görürük. iPhone 16 Pro-nun iPhone 15 Pro ilə müqayisədə daha böyük sensora sahib olacağı deyilir. Ən son məlumatlar həmçinin iki yeni kameranın gələcəyini iddia edirdi. Bunlar 5x optik zoom 12MP periskop telefoto və 48MP ultra geniş kamera sensorlarıdır. Paylaşılan görüntülərdə bir müddətdir qeyd olunan “Capture” düyməsi də görünür.
