Bildiyimiz kimi, Apple şirkəti ötən günlərdə Wonderlust tədbirində bizlərə yeni nəsil iPhone 15 seriyasını və Apple Watch S9 modellərini təqdim etmişdi. Əslində yenilənmiş modellər sələflərindən çox da fərqlənməsə də, Pro seriya daha fərqli imkanlara sahib olmuşdu. Belə ki, Apple brendi titan materialı ilə hazırlanmış korpusa malik olan yeni 15 Pro modellərini həvəskarlarına təqdim etmişdi. Lakin indi məlum olub ki, Apple şirkəti tərəfindən təqdim edilən iPhone 15 Pro modelinin korpusu qismən titandan hazırlanıbmış.
Ümumiyyətlə titan korpusa sahib iPhone modelləri uzunmüddətdir ki, həvəskarlar tərəfindən gözlənilirdi. Məhz bu il Apple şirkəti titandan hazırlanmış korpusa malik olan iPhone 15 Pro və iPhone 15 Pro Max modellərini təqdim edə bilib. Onu da qeyd edək ki, titan dünyanın ən möhkəm materialı olmaqla yanaşı, həm də ən dəyərli metallarındandır. O cümlədən bu material hazırda dərman sənayesində də geniş istifadə olunur. Apple brendi də titan materialını məhz dayanıqlı və möhkəm olmasına görə seçmişdi. Lakin məlum olub ki, iPhone 15 Pro modelləri sadəcə qismən titandan korpusa sahibdir. Qeyd etdiyimiz kimi, bu material dünyanın ən dəyərli metallarındandır. Görünən odur ki, Apple şirkəti də bunun fərqindədir və məhz bu səbəbdən titan materialından az istifadə edib.
Qeyd edək ki, Apple yeni pro seriyasında həm titan həm də saf alüminiumdan istifadə edib. Belə ki, smartfonun korpusunun kənarları tamamilə titan olsa da, arxa tərəfi 100% saf alüminiumdur. Hətta Apple bu iki metalı bir-birinə bərkitmək üçün sənayedə ilk dəfə istifadə edilən unikal bərk cisim diffuziya texnologiyasına müraciət edib. Daha bir maraqlı detal odur ki, sadəcə bir iPhone 15 Pro modelinin bütün istehsal prosesi və rənglənməsi 14 saat ərzində tamamlanır.
