Android ekosisteminə daxil olan cihazlarda bəzi maraqlı xüsusiyyətlər var ki, onlar iOS istifadəçiləri üçün əlçatan deyil. Eyni zamanda bəzi xüsusiyyətlər də məhz iOS əməliyyat sistemində mövcud olduğundan Android smartfon işlədənlər bəzi xüsusiyyətlərdən məhrum olurlar. Bizim birazdan haqqında danışacağımız yenilik isə illərdir Android cihazlar arasında mövcud olan həmişə açıq ekran və ya başqa bir adı ilə “Always-On-Display” rejimin iPhone modellərinə gəlməsi barədə olacaq. Həmişə açıq ekranın nə olduğunu bilməyənlər varsa, bu rejim sizə cihaz kilidli olsa belə daim ekranda saat, bildirişlər, batareya vəziyyəti ilə bağlı məlumat almağa imkan yaradır. Yalnız AMOLED ekran panelinə sahib cihazlarda bu rejimin işləməsi mümkündür. Çünki, AMOLED ekrandan fərqli olaraq IPS LCD ekran panelləri hər bir pikseli ayrılıqda işıqlandıra bilmir. Əgər IPS LCD ekranda bu xüsusiyyəti tətbiq etməyə çalışsanız ekranın bütün hissəsi daim işləyəcəyindən batareyanız sürətlə tükənməyə başlayacaq. Ona görə IPS LCD ekran panellərində tətbiqi effektiv deyil.
iPhone 14 seriyasında həmişə açıq ekran olacağı haradan ortaya çıxdı?
Bu barədə Bloomberg nəşrindən Mark Gurman adlı jurnalist məlumat yayıb. Mark Gurman bildirir ki, bu il payız aylarında təqdim edilməsi planlaşdırılan iPhone 14 seriyası smartfonlardan bəzilərində həmişə açıq ekran (Always-On-Display) xüsusiyyətinin olması barədə hazırlıqlar görülür. Lakin bu rejimin yalnız iPhone 14 Pro və iPhone 14 Pro Max üçün nəzərdə tutulduğu deyilir. Bütün modellərdə OLED tipi ekran paneli istifadə olunmalıdır, amma iPhone 14 və iPhone 14 Max şərti adlı cihazlarında həmişə açıq ekran batareya performansı mənfi təsir etməsin deyə yenilik bu cihazlara tətbiq edilməmiş ola bilər. Digər bir tərəfdən iPhone 14 Pro və iPhone 14 Pro Max modellərindəki ekran panelinin görüntü yeniləmə tezliyi çox aşağı dəyərlərə adaptiv şəkildə düşəcəyindən enerji sərfiyyatına təsiri daha az olacaq. Yəni bu rejim aktivdirsə görüntü 1-10Hz arası tezlikdə yeniləndiyindən batareya tez tükənməyəcək.
Həmin ekran paneli texnologiyası Apple Watch 5 ağıllı saatında da tətbiq olunur. LTPO olaraq adlandırılan texnologiyadan gedir. Adaptiv tezlikli görüntü yeniləmə xüsusiyyəti ilə bu ekran aşağı enerji sərfiyyatı ilə fərqlənir.
