Financial Times tərəfindən verilən məlumata görə, Apple Hindistanda istehsalını artırmağa çalışarkən çətinliklərlə üzləşib. Belə ki, ölkədə istehsal edilən hər iki iPhone gövdəsindən birinin qüsurlu olduğu müəyyən edilib. Bildirilir ki, Tata Group tərəfindən idarə olunan Hindistan fabrikinin digər Apple tərəfdaşı Foxconn üçün cihazları quraşdırmağa göndərdiyi iPhone gövdələrinin yalnız 50%-lik hissəsi qaydasında olur. Başqa sözlə desək, bu fabrikdə istehsal olunan hər iki iPhone gövdəsindən biri Apple şirkətinin keyfiyyət tələblərinə cavab vermir.
Ölkədə istehsalın genişləndirilməsi prosesinin qismən logistika, tariflər və infrastruktur problemlərinə görə ləng getdiyi onsuzda məlumdur. Bununla belə, şirkət 2027-ci ilə qədər iPhone istehsalının yarısını Hindistana köçürməyi planlaşdırırdı. Təxminlərə görə, Apple Hindistanda istehsal edilən korpuslarla bağlı keyfiyyət problemlərini həll edə və tədarükünü təmin edə bilməsə, Çinlə eyni vaxtda Hindistanda iPhone 15 istehsalına başlanması təhlükə altına düşə bilər. Görünən odur ki, Apple ölkədə istehsal bacarıqlarını artırmaq üçün uzunmüddətli plana diqqət yetirməlidir.
Məsələ ilə tanış olduğunu iddia edən şəxslərin sözlərinə görə, şirkət yerli əhaliyə təlim keçmək və istehsal əməliyyatlarının qurulmasına kömək etmək üçün Kaliforniya və Çindən məhsul dizaynerləri və mühəndislərini Hindistanın cənubundakı fabriklərə göndərib. Apple şirkəti ilk olaraq 2017-ci ildə İPhone SE ilə Hindistanda giriş səviyyəli iPhone modellərinin istehsalına başlamışdı. Keçən il Apple Hindistanda istehsalını əhəmiyyətli dərəcədə artırdı. Satışa çıxarılan bəzi iPhone 14 modellərini Hindistanda istehsal etdi. Tatanın gələcəkdə tam xidmət göstərən Apple təchizatçısı olmaq ambisiyaları olduğu və Karnatakada problemli Wistron iPhone quraşdırma zavodu üçün danışıqlar apardığı deyilir.
