Google hər keçən gün daha bir yenilik ilə qarşımızdadır. Belə ki, bu dəfə texnologiya nəhəngi istifadəçilər üçün böyük problemə çevrilən qapalı smartfonları tapmağa həll tapıb. Artıq Google qapalı Android smartfonları belə tapmağa imkan verəcək. Əslində Cihazımı Tap funksiyası uzunmüddətdir ki, bizlərə təklif edilir. Bu funksiya həm Android, həm də iOS smartfonlarından mövcuddur. Hətta Apple bu işi daha fərqli səviyyəyə daşıyaraq AirTag adlı GPS cihazları da təqdim etmişdi. Görünən odur ki, Google əzəli rəqibindən geri qalmaq istəmir. Android smartfonları tapmaq artıq daha asan olacaq.
Google istifadəçilərə qapalı Android smartfonları tapmağa imkan verəcək. Lakin bu xidmət hərkəs üçün əlçatan olmayacaq. Bildiyimiz kimi, Cihazımı Tap xidməti Google hesabınıza qoşulmuş bütün smartfonların, planşetlərin və ağıllı saatların yerini bizlərə göstərir. Həmçinin bu funksiya ilə cihazlardan bütün şəxsi məlumatlarınızı da silə bilərsiniz. İndiyə qədər bir problem var idi ki, cihaz yalnız aktiv və internetə qoşulu olduğu təqdirdə bu funksiya işləyirdi. İndi isə Google bu problemi aradan qaldırır.
Xatırladaq ki, daha əvvəl Google Android cihazların Bluetooth vasitəsi ilə bir-biri ilə ünsiyyət quracağı şəbəkə yaradacağını bildirmişdi. İndi məlum olub ki, Android 14-ün QPR1 beta versiyasında “Siz bu telefonu söndürülmüş olsa belə, Cihazı Tap funksiyasından istifadə edərək tapa bilərsiniz” deyə bildiriş yer alıb. Bu isə onu göstərir ki, Android cihazlar yaxınlıqdakı cihazlar ilə Bluetooth vasitəsi ilə əlaqə yaradaraq sahibinə öz yeri barədə məlumat verəcək. Məhz buna görə də artıq smartfonlar qapalı olduqda və internetə qoşulu olmadıqda da yeri barədə məlumat verəcək.
