Samsung brendinin premium səviyyəli Galaxy Z Fold seriyasının yeni nümayəndəsi olacaq Z Fold 6 Ultra məhdud sayda istehsal olunacaq. Qeyd edək ki, bu smartfon barədə artıq bəzi detallar gün üzünə çıxarılıb. İddialara görə, Galaxy Z seriyasının premium modeli sadəcə müəyyən bazarlarda mövcud olacaq.
Samsung brendi, Galaxy Z Fold 6 və Galaxy Z Flip 6 modellərini bu ilin iyul və ya avqustunda rəsmi olaraq təqdim edəcək. Analitiklər bu il seriyaya əlavə olaraq Galaxy Z Fold 6 Ultra və Galaxy Z Flip SE adlı 2 modelin təqdim ediləcəyini iddia edir. Nəhayət, Fold 6 Ultra barədə bəzi detallar məlum olub. Yeni ortaya çıxan məlumata görə, Galaxy Z Fold 6 Ultra “SM-F958N” model nömrəsinə sahib olacaq. Xatırladaq ki, Galaxy S24 Ultra model nömrəsi SM-S928B, Galaxy S23 Ultra isə SM-S918B model nömrəsinə malikdir. Bir sözlə, Samsung Ultra variantı üçün ümumiyyətlə 8 rəqəmi ilə bitən model nömrələrindən istifadə edir.
Ortaya çıxan əsas iddialardan biri yeni smartfonun sadəcə müəyyən bazarlarda satışa çıxarılacağıdır. Qeyd edək ki, hazırda aşkarlanan model nömrəsi Cənubi Koreyaya aiddir. Məhz bu səbəbdən deyə bilərik ki, yeni smartfon Avropa və ABŞ bazarlarına çıxmaya bilər. Fold 6 Ultra modelinin xüsusiyyətləri hələlik tam aydın olmasa da, bəzi iddialar mövcuddur. Belə ki, smartfonun 200MP f/1.7 əsas kamera, 12MP f/2.2 ultra geniş, 50MP, f/3.4, 5x periskop telefoto kamera sensoru, eləcə də, 6.2 düymlük xarici ekrana sahib olduğu bildirilir.
