Ötən gün Galaxy S23 və Galaxy S23+ modellərinin OnLeaks tərəfindən hazırlanmış render görüntülərini sizlərlə bölüşmüşdük. Həmin görüntülərin ardıyca Galaxy S23 Ultra modelinə aid render görüntüləri də smartprix əməkdaşlığında OnLeaks resursu tərəfindən sızdırılıb. Belə ki, smartfonun öz sələfi olan Galaxy S22 Ultra ilə müqayisədə demək olar çox bir fərqi yoxdur. Apple şirkəti kimi dizaynı cüzi təkmilləşdirərək istifadə etmək prinsipini son illərdə tətbiq edən Samsung şirkəti Galaxy S23 Ultra modelində ciddi bir dəyişiklik etməyib. Əgər smartfonlardan tam anlamayan birinə həm Galaxy S22 Ultra, həm Galaxy S23 Ultra versəniz böyük bir ehtimalla hər iki cihazın eyni olduğunu bildirəcək.
Galaxy S23 Ultra modelinin gövdəsi biraz yastılaşıb və xırda detal dəyişiklikləri edilib
Samsung Galaxy S23 Ultra modelinin render görüntülərinə görə ilk xırda dəyişiklik kamera modulunda görülür. 3 ədəd alt-alta düzülmüş kameraların yaratdığı çıxıntıda heç bir dəyişiklik olmasa da, sağ tərəfdəki 2 ədəd sensorun yaratdığı çıxıntı ləğv edilib. İkinci bir dəyişiklik isə Galaxy S22 Ultra modeli ilə müqayisədə gövdənin daha yastı olmasıdır. Galaxy S22 ultra modelinin kənarı biraz dairəvi olsa da Galaxy S23 Ultra modelinin yan tərəfi biraz düzləşdirilib.
Üçüncü ən vacib dəyişiklik isə ekran çərçivələri ilə bağlıdır. Galaxy S22 Ultra ilə müqayisədə ekranın yan tərəfi 0.1 mm, alt tərəfi 0.7 mm, ekran qarışıq çərçivə qalınlığı isə 0.8 mm azalıb. Nəticədə ekranın çənə qismi demək olar yox olub və hər tərəfdən simmetrik görünən kənar çərçivələri əldə olunub. Smartfonun uzunluğu 163.4 mm, eni 78.1 mm, qalınlığı isə 8.8 mm təşkil edir. Bu ölçüləri ilə Galaxy S22 Ultra modelində 0.1 mm uzun, 0.2 mm enli, 0.1 mm nazikdir.
Smartfonun texniki xüsusiyyətlərinə gəldikdə SM-9180 model nömrəsinə sahib cihazın Snapdragon 8 Gen 2 ilə təchiz edildiyi deyilir. Galaxy S23 və Galaxy S23+ modellərindəki kimi Exynos 2300 ilə bağlı hər hansı bir qeyd edilmədiyindən cihazın yalnız bir variantda istehsal edilməsi ehtimalı həddindən artıq böyükdür. ISOCELL “HP2” 200MP əsaslı kamera konfiqurasiyasına, normaldan 17 dəfə böyük Qualcomm 3D Sonic Max barmaq izi oxuyucusuna və.s sahib olacaq. Ekran panelinin ölçüsü isə 6.8 düym kimi qeyd olunub. Batareya həcmi barədə müəyyən bir informasiya olmasa da 45 Vt şarj dəstəyi ilə təchiz ediləcək. Galaxy S23 Ultra render görüntüləri və bu qədər detal indidən sızdırılmış olsa da cihazın təqdimatı 2023-cü ildən tez baş tutmamalıdır.
