2022-ci ilin sonlarına yaxınlaşdıqca Samsung Galaxy S seriyasının yeni nümayəndələri də bizə yaxınlaşır. Bu da özü ilə birlikdə təqdimatdan əvvəl smartfonlar barədə yeni detalların ortaya çıxmasına səbəb olur. Belə ki, ötən gün axşam OnLeaks tərəfindən smartprix və digitin əməkdaşlığında Galaxy S23 seriyasına aid yeni render görüntüləri paylaşılıb. Galaxy S23 və Galaxy S23+ modellərinə aid olan render görüntüləri Samsung şirkətinin yeni modellərində nələr görə biləcəyimizi ortaya qoyur. Qeyd edək ki, ağ şəkillər Galaxy S23 modelinə, qara şəkillər Galaxy S23+ modelinə aiddir.
İlkin prototiplər əsasında hazırlanmış Galaxy S23 seriyası render görüntülərində ilk diqqət çəkən detal kamera modulu dizaynı ilə bağlıdır. Samsung Galaxy S22 Ultra modelində olduğu kimi qalın çıxıntı yaradan, kənarlardan doğru uzanan kamera modulu Galaxy S23 və Galaxy S23+ modellərinə quraşdırılmayıb. Kamera sensorlarından çölə doğru uzantı birbaşa kamera modulunun özünü formalaşdırıb. Bəziləri bu dizaynı sevsə də, bəziləri zərbələrə qarşı dayanıqsız və ucuz görünüş yaratdığı fikrindədirlər.
Galaxy S23+ modeli sələfi ilə müqayisədə cüzi böyüyüb. 6,6 düymlük ekrana malikdir. Gövdəsi 157,7 mm uzunluğa, 76,1 mm enə və 7,6 mm qalınlığa sahibdir. 0,3 mm uzunluq və 0,3 mm enlilik fərqi mövcuddur.
Galaxy S23 modeli isə 6.1 düym ölçülü ekrana sahibdir. 146,3 mm uzunluğu, 70,8 mm eni, 7,6 mm qalınlığı ilə sələfindən 0,3 mm uzun və 0,2 mm enlidir. Galaxy S23+ modelində gövdə ölçüsünün biraz dəyişməsi texniki cəhətdən heç bir təsir yaratmamalıdır. Lakin Galaxy S23 modelində gövdənin cüzi böyüməsi batareyanın da 5% böyüyərək 3900 mAs həcmə çatmasına şərait yarada bilər.
Smartfonlar texniki cəhətdən Galaxy S22 seriyası modellərindən çox fərqlənməyəcəklər. Lakin iddialara görə Galaxy S23 və Galaxy S23+ modellərindəki ekran panelinin kənarlarındaki qara çərçivələr Galaxy S22 seriyasından cüzi də olsa qalın olacaq. Galaxy S23 render görüntülərində bunu müşahidə etmək çətin olsa da smartfonlar növbəti il təqdim edildikdən sonra bunu adi gözlə baxdıqda görə bilərik. Başqa firmalar ekran çərçivələrini azaldarkən, Samsung ekran çərçivələrini qalınlaşdırsa çox təəccüblənməmək lazımdır. Cihazların iddia edilən texniki xüsusiyyətləri barədə danışmaq isə hələ biraz tezdir. Lakin ən vacib nüans bundan ibarətdir ki, Exynos 2300 çipsetli variantının da hal-hazırda hazırlıq mərhələsində olduğu iddia edilir. Yəni bu cihazın Snapdragon 8 Gen 2 variantı olsa belə ölkəmizə Exynos 2300 çipseti ilə gələ bilər.
